Бразилын Рио-де-Жанейро мужийн цагдаа нар цалинг нь хугацаандаа тавихгүй байгааг эсэргүүцэн ажил хаялт зарлажээ.

 

Рио-де-Жанейро мужийн Цагдаагийн ерөнхий газар мэдэгдэхдээ "мужийн бараг бүх цагдаагийн хэлтсийн цагдаа нар даваа гарагийн өглөөний 8:00 цагаас эхлэн бараг 8 цагийн турш ажил хаясан” гэв.

Ажил хаялтын үеэр тус мужийн нийт цагдаа нарын ердөө 30-хан хувь нь үүргээ гүйцэтгэжээ.

Тэд яаралтай хэргээс бусад бүх дуудлага, гомдлыг хүлээж аваагүй байна.

Рио-де-Жанейрогийн олон улсын нисэх онгоцны буудал дээр цагдаагийн алба хаагчид "Риод ирсэн хэн ч амар тайван байж чадахгүй” гэсэн бичиг бүхий туг барьсан байжээ.

Тус муж санхүүгийн хямралд ороод байгаатай холбоотойгоор цагдаа нарын энэ сарын цалинг хугацаанд нь тавиагүй байгаа аж.

Эдийн засгийн өсөлт нь удааширч, орлого нь буурсны улмаас Рио-де-Жанейро муж хямралд ороод байгаа юм.

Тус мужид энэ хямралыг даван туулахад туслахаар яаралтай санхүүгийн тусламж үзүүлэхээ Бразилын төв Засгийн газар амлажээ.

Хэрвээ нөхцөл байдал сайжрахгүй бол дахин ажил хаялт зарлана гэж цагдаа нарын үйлдвэрчний эвлэл анхааруулжээ.

Наймдугаар сарын 5-нд эхлэх Олимп болон Паралимпыг зохион байгуулахаар тус улс бэлтгэж байгаа учир аюулгүй байдлыг хангах нь тулгамдсан асуудлуудын нэг болоод байна.