Хэдхэн хоногийн өмнө Монголын Залуучуудын Холбоо удтал хүлээлгэсэн Хар, Цагаан жагсаалтаа зарласан. Сонгуулийн өмнөхөн улстөрчдийн сайн мууг дэнсэлсэн учир араасаа чамгүй их хэл ам дагуулаад авсан. Тэдний нэг нь Налайх дүүрэгт нэр дэвшигч С.Амарсайхан. Мань хүн МЗХ-ын ерөнхийлөгч А.Мөнхбатыг "50 саяыг өгвөл цагаан жагсаалтанд оруулна гэж ирсэн. Өгөхгүй гэсэн. Хариу нь хар жагсаалт гэнэ” хэмээн нэгэн баримтыг нь гаргаж жиргэсэн. Гэтэл нөгөөх баримт нь бичиж буй зүйлд нь ямарч холбоогүй байсан гэнэ. Тодруулбал, С.Амарсайханы олон нийтэд дэлгэж, сүр дуулиан үүсгээд буй өнөөх баримт нь хэд жилийн өмнөх шинэ жилийн баримт байсан сурагтай. Үүнтэй холбоотойгоор Монголын Залуучуудын холбооны Ерөнхийлөгч А.Мөнхбат С.Амарсайханыг шүүхэд өгөх гэж байгаа гэсэн шуум чих дэлсээд амжлаа. Хэрвээ 50 сая төгрөг нэхсэн гэдгийг нотолж нь чадахгүй бол яах вэ. Ийнхүү хоёр залуугийн хэн худал ярьж, хэн нь хэнийхээ нэр төрд халдаад байгааг шүүх тогтоох биз. Тэр хүртэл харж суух л үлдлээ.