Ирэх сард болох Олимпын наадмын үеэр аюулгүй байдлыг хангаж, хэв журам сахиулах үүрэгтэй цэргүүдийн тоог Бразилын Засгийн газар 3000-аар нэмэгдүүлжээ.

 

Тус улсын Хуульзүйн яамны мэдэгдсэнээр, эдгээр цэргүүд олон улсын нисэх онгоцны буудал, метроны буудал болон зам талбайд харуул хамгаалалтад гарна.

Тэд мөн терроризмтой тэмцэх ажиллагаанд туслах аж.

Бразилын Хуульзүйн сайд Раул Жунгманны хэлснээр, "Рио-2016”-гийн үеэр аюулгүй байдлыг хангахад оролцох зэвсэгт хүчний албан хаагчдын тоо 21 мянгад хүрчээ.

Тэрбээр хэлэхдээ "хэрвээ шаардлагатай гэж үзвэл бид цэргүүдийн тоог дахин нэмэгдүүлнэ” гэв.

Рио-де-Жанейро хотод 6000 цэргийг хэдийн байрлуулаад байгаа юм.

Наймдугаар сарын 5-21-нд болох Олимпын наадмын үеэр Рио-де-Жанейро хотын эргэн тойронд тэнгисийн цэргийн хүчний 12 хөлөг онгоц, армийн 28 нисдэг тэрэг болон 70 танк байрлуулах аж.

Мөн 20 мянган цэрэг Олимпын хөлбөмбөгийн тэмцээнийг хамтран зохион байгуулах Белу-Оризонти, Бразилиа, Манаус, Сальвадор болон Сан-Паулу гэсэн таван хотод харуул хамгаалалтад гарна.

Риогийн Олимпын үеэр нийт 88 мянган албан хаагч, тодруулбал 47 мянган цагдаа болон 41 мянган цэргийн албан хаагчид аюулгүй байдлыг хангах, хэв журмыг сахиулахад оролцох ажээ. Энэ нь Лондоны Олимпын үеэр ажилласан цэрэг цагдаагийн тооноос хоёр дахин олон гэсэн үг юм.