Бразил улс ирэх сард болох "Рио-2016” Олимпын наадамд 462 тамирчнаа оролцуулж байгаа нь тус улсын түүхэнд Олимпт оролцож буй хамгийн олон хүнтэй баг болж байна. 

 

Бразилын Олимпын хорооноос мэдээлснээр, дээрх тоо өсч магадгүй ажээ.

Бразил улсын Олимпын багт 253 эрэгтэй, 209 эмэгтэй тамирчид багтсанаас гадна тэдэн дээр дасгалжуулагч, эрүүл мэндийн ажилтнууд болон албан тушаалтнуудыг оролцуулаад 344 хүн нэмэгдэх ажээ. Өмнө нь Бразилын Олимпын хамгийн том баг 2008 оны Бээжингийн Олимпт 277 хүний бүрэлдэхүүнтэй оролцож байсан юм.

Харин 2012 оны Лондонгийн Олимпт Бразил улс 259 тамирчин илгээсэн аж.

Хөнгөн атлетикийн тамирчид Бразилын багийн бүрэлдэхүүнд хамгийн олноороо /67 тамирчин/багтжээ. Мөн хөлбөмбөгийн 36 тамирчин, усан сэлэлтийн 33 тамирчин байна. Олимпын наадмыг зохион байгуулж буй тус улсын тамирчид ирэх ням гарагт /7 дугаар сарын 24/ тамирчдын хотхонд хүрэлцэн ирэх юм.

Бразилын хувьд цорын ганц спортын төрөлд буюу эмэгтэй хоккейчдын тэмцээнд тамирчдаа оролцуулах боломжгүй болжээ. Учир нь, тус улсын баг спортын энэ төрөлд анхдагч шалгуурыг давж чадаагүй ажээ.