2016 оны зургадугаар сарын 29-ний өдөр болсноос хойш  24 хоногийн дараа Засгийн газрын гишүүдийг томилж Мэргэжлийн Засгийн газар бүрдсэн.  Гэвч  Мэргэжлийн  засгийн  газрын сайд нарын  томилгоо   гишүүдийн дунд  нэлээд шүүмжлэлийг дагуулсан.  Тухайлбал, УИХ-ын гишүүн А.Сүхбат  энэ тухай "МАН анхны ялагдлыг хүлээлээ.  Салхи ч байхгүй, шинэчлэл ч байхгүй сонголт хийснээрээ анхны ялагдал болж байна”  хэмээн хэлж байсан удаатай. Тиймээс энэхүү байр суурийн  талаар УИХ-ын гишүүн А.Сүхбатаас тодруулахад ийн хариулт өглөө.       

Тэрээр "Би МАН анхныхаа ялагдлыг хүлээлээ гэсэн утгатай юм яриагүй. Бид бүхэн дэвшүүлсэн мөрийн хөтөлбөртөө байж чадахгүй байна аа гэж ярьсныг гуйвуулсан.  МАН мөрийн хөтөлбөртөө мэргэжлийн засгийн газар байгуулна гэж том заалт оруулсан. Үүгээрээ ч бас их олон санал авсан гэж бодож байсан. Гэтэл засгийн газрын гишүүдэд саналын зөрүүтэй хүмүүс оруулж ирсэн тохиолдлууд байгаа. Бүлгийн хурал дээр  энэ бүх асуудлаа  бид ярьсан. Бидний хоорондоо мэтгэлцдэг, санал бодлоо илэрхийлдэг  гол талбар нь  бүлгийн хурал. Тиймээс ч орон нутгаас сонгогдсон гишүүд малын зүс мэддэг, тариа будаа тариад үзчихсэн тийм хүмүүсийг сайд гэж дагуулж очмоор байна гэж хэлсэн. Малчин ард иргэд ч ийм захиас өгсөн гэдгээ ний нуугүй хэлсэн. Түүнээс биш  салхи ч байхгүй, шинэчлэл ч байхгүй сонголт хийснээрээ анхны ялагдал боллоо гэсэн зүйл яриагүй" гэлээ. 

Мөн  тэрээр УИХ-ын чуулганы баасан гарагийн нэгдсэн хуралдааны үеэр  шинээр томилогдсон сайд нарт хандан "томилогдож байгаа сайд нар яамаа миний гэр гэж бодоорой. Ад, дон шүглээгүй л бол хүн гэрээсээ хулгай хийдэггүй"  хэмээн сануулж байсан билээ. 

Б.Алтжин
Эх сурвалж: Breakingnews.mn