50 насандаа хэт тарган байвал таны уураг тархи 10 жилээр хөгшрөх магадлалтай юм. Ийм таагүй дүгнэлтэд Кэмбрижийн их сургуулийн эрдэмтэд хүрсэн байна. Илүүдэл жинд нэрвэгдсэн 50 настай хүний уураг тархи гуалиг биетэй 60 настай хүнийх шиг цагаан шингэнтэй байдаг гэнэ. Цагаан шингэн гэдэг нь уураг тархины хэсгүүдийг холбож өгдөг нэхдэс билээ. Энэ шингэний ачаар аливаа мэдээлэл уураг тархины янз бүрийн хэсгүүдэд хүрч байдаг юм. Эрдэмтэд ийм ялгаа дундаж насны хүмүүсийн уураг тархинд байдаг гэдгийг олж мэдсэнээр бидний уураг тархи 50 орчим насанд ихээхэн эмзэг болж ирдэг хэмээн таамаглахад хүргэв.

Хүмүүний уураг тархи нас ахих тусам жижгэрч байдаг бөгөөд хэт таргалалт энэхүү үйл явцыг хурдасгах магадлалтай гэдгийг эрдэмтэд сүүлийн үед тогтоох болсон. Энэхүү судалгааны ажлыг хийх үедээ эрдэмтэд хэт таргалалт нь нас ахих тусам өрнөдөг үйл явцуудтай ямар нэгэн байдлаар холбоотой эсэхийг тогтоохыг оролджээ. Тэд 20-87 насны 473 хүний мэдээллийг цуглуулсан аж. Олж авсан мэдээллээ судлаачид судалгаанд оролцогчдын биеийн жингээс хамаарч хоёр бүлэгт хуваасан байна. Тэгэхэд л илүүдэл жинтэй хүмүүсийн уураг тархины цагаан бодисын хэмжээ гуалиг хүмүүсийнхээс өөр байсан гэдэг нь тогтоогдсон гэнэ. 50 насандаа илүүдэл жинтэй байх юм бол тухайн хүний уураг тархи хэвийн хэмжээнээс 10 жилээр хөгширсөн байх магадлалтай аж.

Хамгийн гол нь уураг тархины хэмжээний энэхүү өөрчлөлтүүд сэргээгдэж болох үйл явц учраас та жингээ хэвэнд нь баривал эрчимтэй хөгшрөлтийг зогсоох боломжтой юм.