Дуучин Бейонсегийн хөдөлмөрч зан ихээхэн хүндлэл хүлээх нь дамжиггүй юм. Үүнийх нь урамшуулал болгож янз бүрийн шагналуудыг түүнд өгч, үзэгчид ч хайр хүндлэлээ илэрхийлдэг билээ. Саяхан Хатан хаан Би өөрийн Formation гэдэг нэртэй аялан тоглолтынхоо дараачийн үе шатыг эхлүүлсэн байна.

Одоо Бейонсегийн уран бүтээлээс таашаал авч, түүнийг амьдаар нь харах боломж Европ тивийн оршин суугчдад нээгдэнэ. Тэнд дуучин бүсгүй таван долоо хоногт 12 улсын 16 хотод тоглолтоо хийх юм. Дараа нь Бейонсе АНУ-д очиж тоглох бөгөөд энэ оныг дуустал шүтэн бишрэгчдээ баярлуулах гэнэ шүү.

Бейонсегийн тоглолтууд цаашид үргэлжлэх хэдий ч одоогийн байдлаар түүний олсон орлого нэлээд өндөр байгаа аж. Эх сурвалжуудын мэдээлж байгаагаар энэ аялан тоглолтоороо Бейонсе 123 сая доллар олоод байгаа юм. Би цаашид ч ийм эрчимтэй ажиллах юм бол ирэх жил тэрбээр оны хамгийн өндөр орлого олсон дуучнаар тодорч магадгүй билээ.