Дэлхийн хамгийн том никель үйлдвэрлэгч Оросын "Норильск Никель” компанийн нэгэн үйлдвэрээс асгарсан бодисууд Далдикан голыг цусан улаан өнгөтtй болгосон болохыг тус компани хүлээн зөвшөөрчээ.

 

9 дүгээр сарын 5-нд орсон аадар борооны улмаас тус компанийн "Надежда” үйлдвэрийн цэвэрлэх байгууламжийн далан сэтэрч, янз бүрийн бодис Далдикан гол руу цутгасан, гэхдээ энэ нь хүн болон байгальд аюулгүй гэж "Норильск Никель” компани мэдэгджээ.

Өнгөрсөн 7 хоногт Норильск хотын ойролцоох гол ийнхүү улаан өнгөтэй болсонд манай компани  буруугүй хэмээн "Норильск Никель” эрс эсэргүүцэж байсан билээ.

"Үүнийг том асуудал биш гэж хэлж болохгүй. Үйл явдал болсон Таймырийн хойг нь бүхэлдээ "Норильск Никель”-ийн хяналтад байдаг бөгөөд ургамал хэр хэмжээгээр хордсон талаар судалгаа явуулахад тус компани саад хийж байна" гэж Оросын "Гринпис" хөдөлгөөний  идэвхтэн Алексей Киселёв "APF” мэдээллийн агентлагт өгсөн ярилцлагадаа дурджээ.

Мөн үйлдвэрлэлийн бүс дэх хоолойноос химийн бохирдуулагч бодисууд задарснаас голыг улаан өнгөтэй болгосон байж болзошгүй гэсэн таамгийг тус улсын Байгаль орчны яам  дэвшүүлээд байгаа юм.

"Норильск Никель” компани энэ бүхнийг няцааж 9 дүгээр сарын 7-нд гол ямар ч өнгөгүй  тунгалаг болсныг харуулсан зургийг нийтэлжээ.

Тус компани аюулгүй ажиллагааны стандартыг мөрдөхгүй байгааг нутгийн иргэд шүүмжилж байна.