Ингэснээр Вьетнам нь ийм тохиолдол бүртгэгдсэн Зүүн Өмнөд Азийн хоёр дахь улс боллоо. Өнгөрсөн есдүгээр сард Таиландад хэт жижигхэн толгойтой хоёр хүүхэд төрсөн юм.

Вьетнамын төвийн нутгийн Дак-Лак мужид төрсөн дөрвөн сартай хүүхэд "зика”-гийн улмаас хэвийн хэмжээнээс хэт жижигхэн толгойтой гарсныг цусны  болон бусад шинжилгээгээр тогтоосон гэж албаны хүмүүс хэлэв.

Хүүхдийн ээжид жирэмсний гурван сартай байх үед нь халуурах зэрэг шинж тэмдэг илэрч байсан гэнэ. Ингээд 10 дугаар сард авсан шинжилгээгээр энэ эмэгтэй "зика”-гийн халдвар авсан болохыг тогтоожээ.

Одоогоор Вьетнамд энэ эмэгтэйг оруулаад "зика”-гийн халдвар авсан долоон тохиолдол бүртгэгдээд байна.

Насанд хүрсэн хүн "зика" вирусийн халдвар авсан тохиолдолд ноцтой хүндрэл гарахгүй боловч жирэмсэн эмэгтэйчүүд халдвар авсан тохиолдолд тархины төрөлхийн хүнд хэлбэрийн гажигтай, хэт жижигхэн толгойтой хүүхэд төрдөг байна.