Иркутскийн эмнэлэгт орон нутгийн цагаар 8:00 цагийн байдлаар хордлогын улмаас 25 хүн амиа алдсан талаар Эрхүү мужийн Эрүүл мэндийн яамнаас "Интерфакс" агентлагт уламжилсан байна. Яамны ажилтны мэдээлснээр, Эрхүүгийн эмнэлэгт хордлогын улмаас 52 хүн хандсанаас 25 нь нас барж, 26-гийнх нь амь насыг аврахаар эмч нар ажиллаж байгаа аж. Тэднээс нэг хүн хэвтэхээс татгалзаж, өөр эмнэлэг рүү шилжжээ.

Урьдчилсан байдлаар тэдгээр иргэд ОХУ-ын Эрхүү муж, Эрхүү хотод худалдаалагдаж буй "Боярышник” хэмээх, спирт агуулсан нүүр цэвэрлэгч гоо сайхны бүтээгдэхүүнээс хордсон нь тогтоогдоод байгаа аж. Эрхүү хотын захуудад борлуулагддаг тус бүтээгдэхүүнийг уудаг хүн олон байдаг бөгөөд хууль сахиулах байгууллагын ажилтнууд одоогоор 3000 ширхэгийг хураан авчээ. Бүтээгдэхүүний шошго дээр "Ууж хэрэглэхийг хориглоно” гэсэн анхааруулга байдаг ч архинд донтсон зарим иргэд уг бүтээгдэхүүнийг хүний биед хоргүй этилийн спирттэй гэж бодон хэрэглэдэг байна.

Э.ЭНХ-ЭРДЭНЭ