З.Нарантуяа гишүүн “Монполимет”-ийн Ц.Гарамжавыг “мад” тавив
-Судалгаагүй зээл олгосны төлөө Хөгжлийн банкны залуучууд шалгагдаж байгаа шүү. Судалгаагүй зээл авсны төлөө та бас хариуцлагаа хүлээгээд энэ зээлээ хугацаанд нь төлөх юм бол 111 тэрбум төгрөг чинь хорогдох гээд байна-
УИХ-ын чуулганы үдээс өмнөх хуралдаанаар Хөгжлийн банкны талаар авах зарим арга хэмжээний тухай тогтоолын төслийг хэлэлцэх эсэх талаар гишүүд үгээ хэлсэн юм. Энэ үеэр УИХ-ын цөөнхийн бүлгийн З.Нарантуяа гишүүн олонхийн Ц.Гарамжавыг чуулганы танхимд, олны нүдэн дээр тун хүнд байдалд хийлээ.Өмнөхөн нь Ц.Гарамжав гишүүн тун ч шударгаар "Манай улс өрийн тааз нь хэтрээд явчихсан, зээлжих зэрэглэлийг нь бууруулчихжээ. Нийтдээ 2.3 их наяд төгрөг авчихсан нь тодорхой харагдаж байна. Манай улсын шингээхгүй ийм их мөнгийг аваад үрчихсэн байна. Тэгэхдээ дандаа төрийн өмчит байгууллагуудад өгчихсөн. Хувийн өмчтэй тодорхой төсөлтэй цөөхөн компаниудад өгсөн. Би тодорхой мэдэж байгаа. Нэг нь миний удирдаж байсан Монполимет групп байгаа. Тэр группын өр авлага, өрийнхөө хүүг төлж явж байна уу гэдэг мэдээллийг Хөгжлийн банкнаас өгөхийг хүсэж байна” хэмээн хэлчихээд байсан. Тэрбээр төрийн өмчит байгууллагуудад зээл олгосныг буруушааж, хувийн өмчит цөөхөн компанид зээл өгсөн, тэд нь хугацаандаа өр, зээлээ төлж чаддаг гэдгийг өөрийнхөө эзэмшлийн Монполимет группээр жишээ татсан нь энэ.
Харин цөөнхийн З.Нарантуяа гишүүн "Хөгжлийн банкнаас зээл авсан 17 компанийн зургаа нь төрийн компани, 11 нь хувийн компани байгаа юм. Эд зээлээ төлчихвөл бид Хөгжлийн банкны өөрийн хөрөнгийг нэг их наяд төгрөгөөр нэмэгдүүлж, 111 тэрбум төгрөгийн зээлийн батлан даалтын сан байгуулах шаардлагагүй юм. Түрүүн ярьсан "Энержи Ресурс” компанийн нөхцөл байдал хүнд байх үед төр 170 тэрбум төгрөг гаргаад замыг нь худалдаад авсан. Одоо энэ компани эх оронч үзэл гаргаад төрд өгсөн замаа буцаагаад авчихаач ээ. Тэгвэл өөрийн хөрөнгө нь хорогдохгүй, төрийн ачаалал 170 тэрбум төгрөгөөр хөнгөрөх гээд байна. Хоёрдугаарт, "Эрдэнэс Тавантолгой” компани дээр байгаа 250 сая төгрөгийн ачаа ирчихээд байгаа.
Үүнээс болоод эрсдэлийн сан дээр нэмэгдээд байна. 250 тэрбум чинь 2008 онд хамтарсан Засгийн газрын үед "Чалко”-гийн өр болгож аваад, өнөөдөр "Эрдэнэс Тавантолгой” компанид өр болгосон. Үнэн хэрэгтээ Монголын төр хариуцах мөнгө байгаа юм. Үүнийг цэвэрлээд өгчих хэрэгтэй. Дээр нь Монполимет компанийн Ц.Гарамжав захирал "би бол хугацаанд нь зээлээ төлөөд байгаа” гэж ярьсан. Харамсалтай нь ажлын хэсгийн дүгнэлт дээр зээлийн эргэн төлөлтийн хугацааг хойшлуулсан, хоёр удаа хугацаа сунгасан, зээлийн хорооны дүгнэлтгүй зээл авсан юм байна.
Судалгаагүй зээл олгосны төлөө Хөгжлийн банкны залуучууд шалгагдаж байгаа шүү. Судалгаагүй зээл авсны төлөө та бас хариуцлагаа хүлээгээд энэ зээлээ хугацаанд нь төлчихвөл 111 тэрбум төгрөг чинь хорогдох гээд байна. Дээр нь МАК байна. Гурван удаагийн зээлээр 109 тэрбум төгрөг авсан байна. Өнөөдөр 238 хоногийн хугацаа хэтрэлттэй байна. Би үүнийг хэлээгүй ажлын хэсгийн дүгнэлт хэлж байна шүү. Та нар энэ зээлээ төлөх юм бол 111 тэрбум ямар ч хэрэггүй байна. Дээрээс нь үргэлжлүүлээд хэлээд байх юм бол олон зүйл байна. Тиймээс та бүхний ойлголтын зөрүү маш их байдаг юм шүү, шударга л байцгаая” хэмээн чангахан мэдэгдэж олонхийн бүлгийн зарим гишүүдийг тун хүнд байдалд оруулаад авлаа.