Н.Золжаргал гэж энэ хүн монгол улсыг өрөнд оруулах л ажил сүүлийн 20 жил хийлээ. Алга болдоггүй аюул монголын банкны салбарт 20 жил нүүрлээд байгаа юм. Олон улсын үнэлгээний "Moody s” агентлаг энэ сард гаргасан мэдээлэлдээ манай улсын зээлжих зэрэглэл сөрөг хэвээр байгааг дурдсан байна. Мөн улсын болон бусад өр нэмэгдсэн, гадаад валютын албан нөөц буурч 1.4 тэрбум ам.долларт хүрсэн болохыг тэмдэглэсэн байна. Албан мэдээллээс харвал энэ оны гуравдугаар улирлын байдлаар Засгийн газрын өрийн хэмжээ нэрлэсэн үнээр ДНБ-ий 47 хувьтай тэнцэж байна. Энэ нь Төсвийн тогтвортой байдлын тухай хуульд заасан энэ оны өрийн босго болох 58.3 хувьд хүрэхэд 11.3 хувь дутуу гэсэн үг. Тэгэхээр маш товчхондоо манай улсын Засгийн газар хойшид 2.6 тэрбум төгрөгийн өр нэмж тавих эрх зүйн орчин байгаа юм. Өөрөөр хэлбэл энэ ондоо багтааж 1.3 -1.4 тэрбум ам.долларын зээл авахад хууль зөрчихгүй байх нөхцлийг эртнээс бүрдүүлжээ. Гэвч "Эрдэнэс Тавантолгой”-н "Чалко”-д төлөх 350 сая долларын өрийн үлдэгдэл, Засгийн газраас "Рио Тинто”-д төлөх өр, төрийн өмчит компаниудын өр, зээл Засгийн газрын өрийн дүнд ороогүй гэдгийг анхаарах нь зүйтэй болов уу. Угаас эрчим хүч, төмөр зам, уул уурхайн салбарт манай Засгийн газрын өрийн ихэнх хувь нь ногддог тул энэ байдлыг хуулийн зохицуулалтаар "аргалж” дөнгөсөн байдаг.

  Тэгвэл албан бус эх сурвалжийн зүгээс манай улсын Төв банк өмнөд хөршөөс "Чингис бонд”-ын хөрөнгөөс давсан буюу ойролцоогоор 1.9 тэрбум ам.доллартай тэнцэх хэмжээний мөнгийг своп хэлцэл нэрийн дор жилийн 4.5-5 орчим хувийн хүүтэй зээлдсэн болохыг дуулгав. Гэвч энэ талаар УИХ-д мэдээлээгүй нь тун сонин. Ямартай ч энэ талаар албаны эх сурвалжийн зүгээс үгүйсгэсэн мэдээлэл өгч байгаа юм. Тэгвэл бүдэг байгаа энэ мэдээллийн хажуугаар БНХАУ-аас нэг тэрбум ам.долларыг 20 жилийн хугацаатай, жилийн хоёр хувийн хүүтэй зээлэхээр болсон нь шүүмжлэл дагуулаад байна. Учир нь Монгол Улсын нийт гадаад өр 21.7 тэрбум ам.долларт хүрээд байгаа юм. Энэ нь ДНБ-ийн 200 хувиас давсан үзүүлэлт аж. Бүр нарийвчилбал нэг хүнд ногдох өрийн хэмжээ 6300 ам.доллар буюу 12 орчим сая төгрөгт хүрчээ. Үүнээс Засгийн газрын өр нь таван тэрбум гэсэн албан дүн бий. Энэ баримтаар авч үзвэл үлдсэн 16 тэрбум ам.доллар хувийн хэвшлийн өр болж байна. Гэвч эдийн засагчид Засгийн газрын өрийн талаар өөр тоо хэлдэг. Тухайлбал "Өргүй монгол” төрийн бус байгууллагын эдийн засагчид таван тэрбумаас давсан гэж үздэг бол эдийн засагч Х.Батсуурь "6.5 тэрбум ам.долларын гадаад өртэй гэсэн албан бус мэдээлэл бий” хэмээсэн. Цөөн үгээр хэлбэл Засгийн газрын дотоод өр яг хэд байгаа нь одоо хүртэл тодорхой бус. Хэдий ийм ч маргах зүйлгүй үнэн гэвэл эрх баригчид Монгол Улсыг асар богино хугацаанд өрийн дарамтанд оруулсан болохыг олон улсын судалгааны байгууллагуудын дүгнэлтээс харж болохоор байгаа юм. Цөөн үгээр хэлбэл эрх баригч хүчин сүүлийн 3.5 жилийн дотор улсын нийт гадаад өрийг 2.2 дахин буюу 9.6 тэрбум ам.доллараас 21.7 тэрбум ам.доллар болгон өсгөжээ. Эдийн засгийн хүндрэлтэй байдлаас дүгнэхэд 2016 онд ДНБ-ний өсөлт саарч, төлөвлөж буй өсөлтөд хүрэхгүй байх магадлал бий. Энэ байдлаас үзэхэд ДНБ-тэй харьцуулан гаргадаг өрийн босгын дотор багтах зээлийн орон зай улам хумигдана гэсэн үг. Өөрөөр хэлбэл Төсвийн тогтвортой байдлын тухай хуульд гар хүрэхгүй бол ирэх жилээс зээл авах боломж байхгүй болох учиртай. Цаашлаад 2017 онд дэлхийн эдийн засгийн биеийн байдал сэргэхгүй байх дүр зурагтай. Манай улсын хувьд энэ он бүр ч хүнд тусах нь ойлгомжтой. Учир нь оны эхний улирлаас эхлээд бид их өрийн үндсэн төлбөрүүдийг хийж эхэлнэ.

Үүнд хамгийн багадаа төсвийн 30 хүртэлх хувьтай тэнцэх хөрөнгө шаардлагатай байгааг ч эдийн засагчид тооцоолжээ. Энгийнээр авч үзэхэд гадаад өрийн үйлчилгээнд жилд дунджаар 10 хувь төлдөг. Тэгэхээр 20 тэрбум ам.долларт Засгийн газар, хувийн хэвшил нийлээд жилд зөвхөн гадаад өрийн үйлчилгээнд хоёр тэрбум ам.доллар төлж таарах нь. Үүний зэрэгцээ зээлийн үндсэн төлбөрт жилд мөн л хоёр тэрбум орчим ам.доллар төлөх тооцоо гарч байна. 2017 онд Хөгжлийн банкны өрийг төлж эхлэнэ. Дараа жил нь "Чингис бонд”-ын эхний ээлжийн 500 сая ам.долларыг төлөх хуваарьтай. Харин 2020 он гэхэд үлдсэн нэг тэрбум ам.долларыг нь төлж дуусгах юм. Үүнээс зөвхөн "Чингис бонд”-ын хүүнд ойролцоогоор 630 сая ам.доллар төлөх тооцоо гарч байна. Мэдээж, үүн дээр үндсэн төлбөрт 1.5 тэрбум ам.доллараа төлөх нь гарцаагүй. Тийм л учраас гадна дотны байгууллага болоод үндэсний эдийн засагчид "2017-2020 он хүртэл эдгээр өрийг төлөөд явахад хүндрэл үүсч болзошгүй” гэсэн дүгнэлтийг гаргаад байгаа юм. Засгийн газрын өрийн босгыг эрх зүйн үүднээс бус бодит байдлаас дүгнэхэд сэрэмжлүүлсэн түвшингээс аль хэдийн давсан гэдгийг хэн хүнгүй мэднэ. Гэсэн хэдий ч өмнөд хөршөөс эхлээд "Азийн хөгжлийн банк”, "Рио Тинто” гэх мэтээр зээлийн олон эх үүсвэр манай улсын өмнө бэлэн байна. Харин манай улсын зээлжих зэрэглэл B2 буюу найдваргүй зээлдэгчийн тоонд орсон байгаа тул зээлийн хүү өндөр, арван хувиас дээш байх магадлал нэгэнт үүслээ. Тиймээс нэмж зээл авах нь эдийн засгийн хүнд хэцүү цаг үед эргэн сэргэх боломжийг хааж байгаа хэлбэр болох нь ойлгомжтой байгаа.