Туркийн цагдаа Лхагва гарагт Истанбулын халдлагатай холбогдуулан нэмж хэд хэдэн сэжигтнийг баривчилсан байна. Үүний дараа Анкарагийн албаны эх сурвалж халдлага үйлдэгчийг Уйгар үндэстэн байж болзошгүй байгааг мэдээлжээ. Гэсэн хэдий ч шинэ оны эхний өдөр шөнийн клубт зэвсэгт халдлага үйлдсэн этгээд олдоогүй байна. Ням гарагийн шөнө Истанбул хотын Европын хэсэгт байрлах Рэйна клубт нэвтэрсэн этгээд шинэ жил тэмдэглэж байсан хүмүүс рүү гал нээж, 120 сум цацсанаар 39 хүн алагдсаны 27 нь Турк биш, гадаадын иргэд байсан юм. Өнгөрсөн Даваа гарагт Исламын улс бүлэглэл халдлагыг үйлдсэнээ зарласан нь Туркэд болсон халдлагыг анх удаагаа өөртөө хүлээж байгааг ил тод зарласан явдал байлаа. Тэдний мэдэгдэлд Турк улс Сирийн хойд нутагт цэргийн ажиллагаа явуулсныхаа төлөө ийм шийтгэл хүртэж байгааг тайлбарласан байв. Турк улс одоо бүх хилийн боомтууд, нисэх буудлуудад хяналтыг чангатгаж, алуурчныг эрэн сурвалжилж байна. Ерөнхий сайдын орлогч Вэйси Кайнак өчигдөр орон нутгийн телевизийн сувагт ярихдаа алуурчин нь Уйгар үндэстэн байх өндөр магадлалтайг хэлээд, түүнийг Туркээс зугтуулахгүйн тулд бүх арга хэмжээг авч байгаа гэжээ. Уйгарууд нь зүүн Туркстан гэгддэг түүхэн нэртэй Хятадын Шинжаанд голлон суудаг. Мөн хуучин ЗХУ-ын бүрэлдэхүүнд байсан Төв Азийн орнуудад тодорхой хэмжээгээр амьдардаг юм. Өмнө нь алуурчныг Киргиз эсвэл Узбек хүн гэсэн таамаглал дэвшүүлж байв. Кайнак уг хэргийг маш сайн зохион байгуулалттай төлөвлөж үйлдсэн байгаа нь алуурчныг аль нэг томоохон зэвсэгт бүлэглэлийн гишүүн гэсэн дүгнэлтэд хүргэж байгааг хэлжээ.