Берлин хотын нисэх онгоцны буудалд тэсрэх бөмбөг дэлбэлэхээр төлөвлөж байсан хэрэгт сэжиглэгдэн баривчлагдсан Сирийн цагаач залуу Германы Лейпциг хотын шоронд амиа хорлосон тухай албаны хүмүүс мэдэгдлээ.

 

Тус улсын Саксон мужийн Хууль зүйн яамнаас гаргасан мэдэгдэлд "сэжигтэн Жабер Аль-Бакер амиа хорлосон байна. Хэргийг мөрдөн шалгаж эхэлсэн” гэжээ.

Сэжигтнийг өнгөрсөн даваа гарагт нутаг нэгт гурван хүн цагдаагийн газарт барьж авчирч өгсөн юм. Цагдаа нар түүнийг хоёр өдрийн турш эрэн сурвалжилж байсан юм.

Германы цагдаа нар түүнийг олон сарын турш ажиглаж байжээ. Өнгөрсөн долоо хоногийн бямба гарагт гэрт нь нэгжлэг хийхээр очих үед тэрбээр зугтжээ.

Германд өнгөрсөн онд ирсэн түүнд орогнох эрх олгосон байна.

Цагдаа нар түүний гэрт нэгжлэг хийх үеэрээ гар аргаар тэсрэх төхөөрөг хийхэд ашигладаг "TATP” тэсрэх бодис байсныг /1.5 кг/ олж илрүүлжээ. Өнгөрсөн онд Парист, энэ оны гуравдугаар сард Брюссельд болсон халдлагыг үйлдэхэд ийм төрлийн бодис ашигласан байна.