Тухайн үедээ намынхаа залуучуудын атааг төрүүлж жагсаалтын гуравт бичигдсэн Х.Тэмүүжин шууд л Н.Алтанхуягийн Засгийн газарт Хууль зүйн сайдын албанд морилсон нэгэн. Тэр эрийнхээ сайнд жагсаалтын эхэнд эрэмбэ эдэлж, Хууль зүйн сайд болсон гэхэд хэтийдсэн хэрэг болохгүй. Учир нь тэрээр 2008 оны долдугаар сарын 1-ний үймээнээс хойш хэдэн хонгио үзүүлэн энэ хэргийг дэлгэнэ илчилнэ гэж явсныхаа хүчинд ийнхүү өндөр авсан хэрэг. Тодруулбал, тэр энэ үймээнийг зохион байгуулсан байж болох намынхаа ах нарт дарамт үзүүлсэн гэдэг. Харин Хууль зүйн сайдаар ажиллаж байхдаа хар тамхичин гэх охинтой нэр холбогдож улмаар суудлаасаа бууж, энэ цагаас хойш хоосон гоморхол тээж явааг намынх нь нөхөд дуулгасан. Харин сайдын суудлаас буусан шалтгаанаа улстөрийн зохион байгуулалт хэмээн шууд дүгнэсэн. Тэр сайдаар ажиллаж байхдаа шинэчлэл нэрийн дор нэлээд ажлыг эхлүүлсэн ч энэ бүгд нь талаар болсон гэхэд болно. Айсуй сонгуулиар түүнд намын жагсаалт бүү хэл тойрог олдоход ч хэцүү болсон гэдгийг ч нуусангүй.