Хятад улс Монголоос ирэх жил 400 мянган тонн өвс хадлан импортоор авахаар болжээ. Сүү сүүн бүтээгдэхүүний эрэлт хэрэгцээ Хятадад нэмэгдсээр байгаатай уялдан Өвөр Монголын Шилийн гол аймаг өвс бэлчээрээр арвин манай зүүн гурван аймагтай харилцан гэрээ байгуулсан бөгөөд өнгөрсөн долоо хоногт гэхэд л Шилийн голын Зүүн хатавчийн боомт дээр 200 тоннын даацтай найман машин ирж гэрээт өвсөө авч буцсан байна. Энэ жилийн хувьд хятадууд он дуустал нийтдээ 100 мянган тонн өвс худалдаж авах бол ирэх жил энэ тоо огцом өсч 400 мянган тоннд хүрэх аж. Өвс хадлан бэлтгэх эх үүсвэрээр буурай Хятад улс энэ төрлийн хэрэгцээгээ АНУ, Австралиас хангадаг байсан боловч нийлүүлэгч талуудын түүхий эдийн үнэ нэмэгдсэнээр хомсдол үүсч, Хятадын сүү, сүүн бүтээгдэхүүний үйлдвэрлэл сүүлийн хоёр жилд мэдэгдэхүйц буурахад хүрээд байгаа юм.