Сүүлийн жилүүдэд өсвөр насны хүүхдүүд ахуйн хүрээний хий үнэрлэж мансуурах, цаашлаад амиа алдах харамсалтай хэргүүд гарсаар байна.

Өнгөрсөн онд гэхэд ерөнхий боловсролын гурван хүүхэд орцонд мансуурч байгаад нэг нь амиа алдсан бол, мөн Баянзүрх дүүргийн нутаг дэвсгэрт гэртээ газ үнэрлэж байгаад амиа алдсан хэрэг гарсан. Түүнчлэн орон нутагт ч газ үнэрлэж байгаад 16 настай хүү эмнэлгийн тусламж авч чадалгүй амиа алдсан харамсалтай хэргүүд гарсаар байна.

Тэгвэл энэ он гарсаар ийм төрлийн гэмт хэрэг цагдаагийн байгууллагад нэг бүртгэгджээ. Тодруулбал, Хан-Уул дүүргийн 10 дугаар хороонд өнгөрсөн дөрөвдүгээр сарын 30-ны өдөр өсвөр насны хүүхэд газ үнэрлэж, нас баржээ. Төв цэвэрлэх байгууламжийн орчимд 17-18 насны таван хүүхэд газ үнэрлэж байгаад нэг нь таталт өгч эмнэлгийн тусламж авч чадалгүй амиа алдсан гэдгийг эх сурвалж хэлж байна.

Эдгээр хүүхдүүдийн хоёр нь ЕБС-ийн сурагч, гурав нь оюутан бөгөөд дөрвөн хүүхдийн биеийн байдал хэвийн байгаа аж. Мөн энэ өдөр Баянзүрх дүүргийн 25 дугаар хороонд 16-18 насны хоёр хүүхэд газ үнэрлэж байхад нь газ нь дэлбэрч гэмтжээ. Гэмтсэн хүүхдүүд одоогоор ГССҮТ-т эмчлүүлж байгаа аж.

Дашрамд дурдахад, өнгөрсөн жил өсвөр насны хүүхдүүд газ үнэрлэсэн 30 тохиолдол бүртгэгджээ. Харин энэ он гарсаан хоёр тохиолдол бүртгэгдсэн нь дээрх хоёр хэрэг ажээ.

О.Сайхан