Эцэг эхчүүдийн хайхрамжгүй хараа хяналтгүй байдлаас болж 0-3 насны хүүхдүүд халуун хоол цайнд түлэгдэж эрүүл мэндээрээ хохирох, цаашлаад амиа алдах харамсалтай хэргүүд өдөр алгасахгүй гарч байгаа нь эмгэнэлтэй хэрэг юм.

Цагдаагийн хоногийн мэдээнд өдөрт л 1-2 хүүхэд түлэгдэж нас барлаа гэсэн мэдээлэл байна.

Зуны улиралд ГССҮТ-ийн Түлэнхийн тасаг ачаалалаа дийлдэггүй бөгөөд өнөөдрийн байдлаар өрөө тасалгаа дүүрэн түлэнхийн шархандаа зовиурлаж, уйлсан орилсон хүүхдүүд байна. Өчигдөр гэхэд эмчлүүлж байсан нэг хүүхэд нас барав.

Тодруулбал, БГД-23 хороонд оршин суух С /эр.02н/ 07-р сарын 11-нд гэртээ халуун цайнд түлэгдэн хэвтэн эмчлэгдэж байгаад нас баржээ. Хүү эмчлүүлж байгаад нас барав. Хүүгийн биеийн байдал нэлэнхүйдээ гүн түлэгдэж нөхөн сэргээх эмчилгээ хийсэн ч эмчилгээ авч чадахгүй шокийн байдалд байсаар байгаад нас барлаа.

Дэндүү харамсалтай эмгэнэлтэй хэрэг шүү, эцэг эхчүүдээ. Бага насны хүүхдээ хаана юу хийж явааг хараач, мөн халуун хоол цай, халуун тогоогоо хүүхэд хүрэхгүй газарт "нуугаач” ээ. Жилд дунджаар бага насны 30-40 хүүхэд амиа алдаж байна гэсэн тоог ГССҮТ-ийн эмч нар ярьж байна. Тиймээс цагдаа болон эмнэлгийн байгууллагаас гэнэтийн болзошгүй эрсдэлтэй аюулаас хүүхдээ урьчилан сэргийлэхийн тулд бага насны хүүхдэдээ тавих хараа хяналтаа сайжруулахыг сануулсаар байна.

О.Сайхан