Жижиг дунд үйлдвэрийг хөгжүүлэх сангаас тавдугаар сарын 27-ноос энэ сарын 10-ны хооронд урт хугацаатай хөнгөлөлттэй зээл олгох, төсөл сонгон шалгаруулах ажлыг зохион байгуулсан. Уг санд төслөө илгээн, санхүүжилтээ амжилттай авах эсэх асуудлаар мөн Жижиг дунд үйлдвэрийг хөгжүүлэх сан болон Чингис бондын талаар "Монголд бид үйлдвэрлэв" ТББ-ын тэргүүн Г.Майцэцэг мэдээлэл хийлээ.  Жижиг дунд үйлдвэрийг хөгжүүлэх сан жижиг, дунд үйлдвэрлэл эрхлэгчдэд зориулж урт хугацааны, хөнгөлөлттэй зээл олгох зорилттой ч 2752 иргэн, аж ахуй нэгжид олгох зээлийн хөрөнгө улсын төсөвт байхгүй учраас жижиг дунд үйлдвэр хангалттай хөгжиж чадахгүй, мөн ямар шалгуураар, хэнд хөнгөлөлттэй зээлийг олгож буй нь тодорхой бус байна гэлээ.

"Монголд бид үйлдвэрлэв" ТББ тэргүүн, "Exclusive” брэндийн үүсгэн байгуулагч  Г.Майцэцэг "Өнөөдрийн байдлаар хөдөө орон нутаг болон Улаанбаатар хотоос нийт 2752 иргэн болон аж ахуй нэгж 487 тэрбум төгрөгийн санхүүжилтийг ЖДҮХС-аас зээл хүссэнээс хөдөө орон нутгаас 828 иргэн, Улаанбаатар хотоос  495 иргэн уг сангаас 128 тэрбум төгрөгийн санхүүжилт авахаар материалаа өгчээ. Уг санд 1429 аж ахуй нэгж төслөө илгээснээс хөдөө орон нутагт 513, Улаанбаатар хотод 916 аж ахуй нэгж 359 тэрбум төгрөгийг ЖДҮХС-аас хүссэн байна. Жижиг дунд үйлдвэр эрхлэгчдэд шаардлагатай байгаа 487 тэрбумыг улсын төсөвд хэрхэн бүрдүүлэх тухай УИХ нэг ч удаа хэлэлцээгүй, дорвитой шийдэлд хүрэхгүй байна. Жижиг дунд үйлдвэрлэлийн тухай асуудал жижиг асуудал биш. Учир нь нэг иргэн хамгийн багадаа 3-5 хүн, нэг аж ахуй нэгж 10-20 хүнийг ажлын байраар хангаж байна. Эдгээр итгэл үнэмшлээрээ төслөө илгээсэн аж ахуй нэгж, хувь хүмүүс гарааны бизнес эрхлээгүй. Харин тодорхой хэмжээнд монголын зах зээлд өөрсдийн гэсэн байр суурийг тогтвортой таван жил ажиллаад бий болгочихсон, иргэдэд танигдчихсан, барьцаалах хөрөнгөтэй хүмүүс байгаа. Төрийн эрх мэдэлтнүүд танил талаараа дамжуулж Хөгжлийн банкнаас олгосон Чингис бондтой адил хуваарилалт болгохгүйн нь төлөө тэмцэх хэрэгтэй. Иргэд нь тэмцдэггүй улс хөгждөггүй ” хэмээв.

Л.Сайхансанаа