Их Британийг Европын Холбооноос гаргах үйл явцыг дахин хойшлуулахыг эрмэлзэж буй сөрөг хүчний хууль тогтоогчид Ерөнхий сайд Борис Жонсонд итгэл үзүүлэх эсэх асуудлаар санал хурааж магадгүй байна.

 

Шотландын Үндэсний намын төлөөлөгч Стюарт Хоси өнгөрсөн ням гарагт "BBC” сувагт мэдээлэхдээ, Нийтийн танхимд итгэл үзүүлэх эсэх асуудлаарх санал хураалтыг ирэх долоо хоногт явуулах магадлал өндөр байна гэжээ. Хэрэв парламентын гишүүд Б.Жонсонд итгэл үзүүлээгүй тохиолдолд тэрбээр цөөнхийн Засгийн газрыг эмхлэн байгуулахийг Хөдөлмөрийн намын дарга Жереми Корбинд зөвшөөрөхөөс аргагүйд хүрэх ажээ.

"Brexit”-ийн талаарх тодорхойгүй байр суурийнхаа улмаас шүүмжлэлтэй тулгардаг Ж.Корбин нь дэмжигчдийн хувийн үзүүлэлтээр хамгийн сул сөрөг хүчний удирдагчид тооцогддог байна. "Их Британийг ЕХ-ноос 10 дугаар сарын 31-нд гаргахаас зайлсхийх цорын ганц арга зам нь Ж.Корбиныг "Downing Street” рүү илгээх юм” гэж С.Хоси хэлжээ.