НҮБ-ын Ерөнхий нарийн бичгийн дарга Антонио Гутерреш ирэх наймдугаар сард болох Токиогийн Олимпын наадмын хаалтын ёслолд оролцохын өмнө Хирошима хотод очих хүсэлтэй байгаа талаар уг мэдээлэлд ойр эх сурвалжууд мэдээлжээ.

 

"А.Гутерреш наймдугаар сарын 6-нд буюу Хирошима хот атомын бөмбөгдөлтөд өртсөн өдөр болох амиа алдагсдын дурсгалыг хүндэтгэх ёслолд оролцож үг хэлэх төлөвтэй байгаа бөгөөд тэрбээр спортын арга хэмжээгээр дамжуулан энх тайван, илүү сайхан дэлхийг цогцлоохыг уриалахыг эрмэлзэж байгаа" гэж эх сурвалжууд мэдээлсэн байна. 

НҮБ-ын Ерөнхий нарийн бичгийн дарга нар 1990-ээд оноос хойш бүх зуны Олимпын наадмын нээлтийн ёслолд оролцжээ. Харин А.Гутеррешийн хувьд Хирошима хотод очсоны дараа Токио хотноо болох хаалтын ёслолд оролцох хүсэлтэй байгаагаа өнгөрсөн 12 дугаар сард илэрхийлжээ.

Япон А.Гутеррешийн Хирошима хотод очих саналыг дэмжиж байгаа боловч НҮБ-ын Ерөнхий нарийн бичгийн даргыг долдугаар сарын 24-нд болох нээлтийн ёслолд уламжлалын дагуу оролцох хэрэгтэй хэмээн Токиогийн Олимпын наадмыг зохион байгуулах хорооны зарим гишүүн үзэж байгаа ажээ.