ТАНИЛЦ: ХАМГИЙН БАЯН “ХУРГАН” ДАРГА НАР
Саарал ордон, салбар яамд хавиар бужигнаантай, төрийн албаныхан тэр чигтээ үүрээ эвдүүлсэн шоргоолж шиг л үймцгээж байна, энэ хэдэн өдрүүдэд. Үймэхээс ч яах вэ, Засаг солигдох нь төрийн албаныханд заримд нь зовлон, заримд нь завшаан байдаг хойно. Танил сайтай, тал засахдаа сайн, ардаа ахтай, арын хаалганы түлхүүр олонтой бол Засаг солигдсон дүйвээнээр салбар хамаарахгүй суга дэвшинэ. Зам тээврийн яаманд хэлтсийн дарга явсан нөхөр Засаг солигдсоны дараа Байгаль орчны яаманд газрын дарга болоод дэвшчихсэн явах нь энүүхэнд. Өнгөрсөн 30 жил ийм маягаар яамнаас яам, агентлагаас агентлаг, газар, хэлтэс дамжин даргын суудал сэлгэж нүүдэллэсэн бүхэл бүтэн "хүн сүрэг” бий болчихсон байна. Дарга болохын хэрээр давхар байшинд амьдарч, данагар жийп унадаг учраас дарга болох далд мөрөөдөл тээгсэд төрөөр дүүрчихсэн байна.
Тэгвэл төрийн албан дахь хамгийн баян "хурган” дарга нарыг танилцуулж байна. Ингэхдээ том артай, татаасаар тушаал дэвшсэн болон яамнаас яам дамжин нүүдэллэж, дарга сэтэр зүүж яваа "хурган” дарга нарыг түүвэрлэлээ.
УИХ-ын гишүүн Б.Саранчимэгийн төрсөн дүү, ХХААХҮЯ-ны газрын дарга В.Үнэнбат 1.7 тэрбум төгрөгөөр үнэлэгдэх хурдан удмын 40 адуутай
УИХ-ын гишүүн Б.Саранчимэгийн төрсөн дүү Б.Оюунчимэгийн нөхөр В.Үнэнбатын төрд дарга болсон зам тун дардан байсан. В.Үнэнбат эхлээд хадам ах Б.Наранхүүгийнхээ "Дүнжингарав” худалдааны төвийн үйл ажиллагаа хариуцсан захирлаар, менежерээр ажилладаг байлаа. Харин 2016 оны сонгуулийн дараахан Тариалан эрхлэлтийг дэмжих сангийн гүйцэтгэх захирлаар томилогдсон. Одоо ХХААХҮЯ-ны Газар тариалангийн бодлогын хэрэгжилтийг зохицуулах газрын дарга болж дэвшээд буй. Худалдааны төвийн менежерээс Газар тариалангийн бодлого тодорхойлдог болж суга дэвшсэн гэсэн үг.
В.Үнэнбат нь 1.7 тэрбум төгрөгөөр үнэлэгдэх гурван орон сууцтай, 1.7 тэрбум төгрөгөөр үнэлэгдэх хурдан удмын 40 адуутай, 1.4 тэрбум төгрөгийн хадгаламжтай, 1.8 тэрбум төгрөгийн авлагатай гэж ХОМ-тээ мэдүүлсэн байдаг. Мөн В.Үнэнбат "Үнэн хайрхан” ХХК, "Фэйшн Трий” ХХК, "Таун” ХХК, "Топ стандарт” ХХК-иудыг эзэмшдэг.
ШШГЕГ-ын дарга Дэлэгийн Загджав 4.2 тэрбум төгрөгийн орон сууцтай
Даргын даллагатай гэмээр аль ч Засгийн үед албан тушаал алдаж үзээгүй нэг хүн байдаг нь Д.Загджав. Тэр 2000 оноос хойш төрд ажилласан буюу ХУД-ийн Засаг дарга, УИХ-ын гишүүн, Байгаль орчны яамны Төрийн нарийн бичгийн дарга, Уул уурхай, хүнд үйлдвэрийн яамны дэд сайдын албыг хашиж байгаад ШШГЕГ-ын даргаар томилогдсон.
Өдгөө Д.Загджав 4.2 тэрбум төгрөгөөр үнэлэгдэх хоёр орон сууц, 460 сая төгрөгөөр үнэлэгдэх Hammer H2, Lexus470 Lexus570, Infiniti FX35 маркийн дөрвөн жийп болон Lexus LX460 маркийн хоёр суудлын автомашинтай, 130 сая төгрөгийн үнэт эдлэл, 382 сая төгрөгийн хадгаламжтай.
Сангийн яамнаас Байгаль орчны яам руу "урвасан” Г.Түвдэндорж 931 сая төгрөгийн хадгаламжтай
Гантөмөрийн Түвдэндорж Сангийн яамны Нягтлан бодох бүртгэлийн бодлогын газрын дарга, Төсвийн хөрөнгө оруулалтын газрын даргаар ажиллаж байгаад өнгөрсөн хавар Байгаль орчин, аялал жуулчлалын яамны Дэд сайдаар томилогдсон.
1.2 тэрбум төгрөгийн нэг орон сууцтай, 150 сая төгрөгөөр үнэлэгдэх хурдын удмын 30 адуутай, 931 сая төгрөгийн хадгаламжтай, 300 сая төгрөгийн авлагатай, 166 сая төгрөгийн Ланд-200 автомашинтай. Тэрбээр Монголбанкны Ерөнхийлөгч асан О.Чулуунбат агсны хүргэн.
Эрчим хүчний дэд сайд М.Баярмагнай 3.2 тэрбум төгрөгийн орон сууцтай
Эрчим хүчний яамны дэд сайд Мягмарсүрэн Баярмагнай. Өмнө нь Эрчим хүчний яамны Төрийн захиргаа удирдлагын газрын дарга, Байгаль орчин, аялал жуулчлалын яамны Төрийн захиргаа удирдлагын газрын дарга, Засгийн газрын Хэрэг эрхлэх газрын дэд даргаар тус тус ажиллаж байсан. М.Баярмагнай нь 3.2 тэрбум төгрөгийн үнэтэй гурван орон сууц, нэг хаустай, 984 сая төгрөгийн авлага, 2.6 тэрбум төгрөгийн зээлтэй.
Баянзүрх дүүргийн Засаг дарга Н.Баярмөнх 6.5 тэрбум төгрөгийн зургаан үл хөдлөхтэй
Н.Баярмөнх нь 2008 оноос эхлэн БЗД-ийн МАН-ын хорооны дарга, БЗД-ийн ИТХ-ын төлөөлөгч, Засаг даргын орлогч, НИТХ-ын төлөөлөгч, тэргүүлэгчээр ажиллаж байгаад БЗД-ийн Засаг даргаар томилогдсон.
БЗД-ийн Засаг дарга Н.Баярмөнх нь 6.5 тэрбум төгрөгийн гурван орон сууц болон гурван үйлчилгээний барилгатай, 232 сая төгрөгийн Lexus RX330, Land-200 маркийн хоёр жийптэй, 1.2 тэрбум төгрөгийн эзэмших эрхтэй газартай, 65 сая төгрөгийн үнэт эдлэл, 644 сая төгрөгийн зээлтэй.
ИНЕГ-ын дарга С.Мөнхнасан таван компанитай
ИНЕГ-т хэлтсийн дарга, дэд даргаар ажиллаж байгаад дарга болж дэвшсэн. 650 сая төгрөгийн хоёр хаус, дөрвөн орон сууцтай, 355 сая төгрөгийн Toyota Tundra, Land-200, Mercedes benz маркийн гурван жийптэй, 189 сая төгрөгийн мал, 155 сая төгрөгийн үнэт эдлэлтэй, 391 сая төгрөгийн хадгаламжтай, таван компани эзэмшдэг.
Жижиг дунд үйлдвэрийн газрын дарга Я.Эрдэнэсайхан зургаан орон сууцтай
Я.Эрдэнэсайхан нь өмнө нь Гадаадын иргэн, харьяатын газарт нэгжийн дарга, ХХААХҮЯ-ны Жижиг дунд үйлдвэр, хоршооны бодлогын хэрэгжилтийг зохицуулах газрын дарга, Төрийн захиргаа удирдлагын газрын даргаар ажиллаж байгаад Жижиг дунд үйлдвэрийн газрын даргаар томилогдсон.
Я. Эрдэнэсайхан нь 2.0 тэрбум төгрөгийн зургаан орон сууц болон нэг амины хаус, нэг үйлчилгээний барилгатай, 170 сая төгрөгийн гурван автомашинтай, өмчлөх болон эзэмших таван газартай, 104 сая төгрөгийн хадгаламжтай.
Төрийн өмчийн бодлого зохицуулалтын газрын дарга Б.Цэнгэл 200 сая төгрөгийн авлагатай
Б.Цэнгэл өмнө нь Улаанбаатар хот дахь Гаалийн газрын орлогч дарга, Замын-Үүд дэх Гаалийн газрын дарга, Зам, тээвэр, барилга хот байгуулалтын дэд сайд, "Монголын төмөр зам” ТӨХК-ийн гүйцэтгэх захирлаар ажиллаж байгаад Төрийн өмчийн бодлого зохицуулалтын газрын дарга болсон.
Б.Цэнгэл 1.2 тэрбум төгрөгийн нэг орон сууц болон нэг хаус, нэг үйлчилгээний барилга, хоёр оффистой, 190 сая төгрөгийн урлаг, түүхийн үнэт эдлэлтэй, 174 сая төгрөгийн хадгаламжтай, 201 сая төгрөгийн авлагатай, дөрвөн компани эзэмшдэг.
ҮСХ-ны дарга Б.Батдаваа 16 компанид хувьцаа эзэмшдэг
Үндэсний статистикийн хорооны дарга Батмөнхийн Батдаваа өмнө нь Монголбанкны Төлбөрийн тэнцлийн статистикийн судалгааны хэлтсийн захирал, Гадаад валютын нөөцийн удирдлагын хэлтсийн захирал, Зах зээлийн газрын захирал, Судалгаа статистикийн газрын захирлаар тус тус ажиллаж байсан.
Б.Батдаваа 1.2 тэрбум төгрөгөөр үнэлэгдэх таван орон сууцтай, 50 сая төгрөгийн түүхийн үнэт эдлэлтэй, 5.2 тэрбум төгрөгийн хадгаламжтай, 269 сая төгрөгийн авлагатай, 16 компанид хувьцаа эзэмшдэг.
Эх сурвалж:ergelt.mn
Сэтгэгдэл байхгүй байна.