Энэ удаагийн ковид цар тахал бидэнд ямар зүйлсийг ухааруулав, сургав гээд бодвол олон зүйл бий. Цар тахал гэлтгүй ханиад томуугийн халдвар өндөр үед амны хаалтыг тогтмол зүүх, олон нийтийн газар зай барьж, соёлтойгоор үйлчлүүлэх гээд соёлт хүн төрөлхтний соёлоос багагүйг бидэнд заасан. Харин Засгийн газрын шуурхай арга хэмжээ, ард түмний хүлээцтэй байдал эргээд дэлхий нийтэд үлгэр үзүүлсэн гэхэд болно. Учир нь Засгийн газраас дэлхийн бусад улс орнуудын адил хөл хорио тогтоосон вакцинжуулалтыг маш шуурхай, чанартай хийсэн. Олон тунт вакциныг нийт иргэддээ хийхийн тулд сайн зохион байгуулалт, мэргэжлийн ур чадвар, мэдээлэл сурталчилгааг өндөр түвшинд хийж чадсан учраас Азидаа вакцины хамрагдалтаар дээгүүрт тооцогдож, бусдыг бодвол эрсдэл харьцангуй бага гарсан. Мэдээж Засгийн газраас олон улстай сайтар харьцаж, ойлгуулж чадсан болохоор вакцины олдоц ч харьцангуй сайн байсан. Мөн Ази-Номхон далайн бүс нутагтаа хамгийн анх хөл хориогоо цуцалсан таван улсын нэг болж чадсан билээ.

Үүнээс гадна бүх зүйл хаалттай байсан тэр цаг үед Засгийн газраас Эрүүл мэндээ хамгаалж, эдийн засгаа сэргээх "10 их наядын хөтөлбөр”-ийг амжилттай хэрэгжүүлсэн нь иргэд, аж ахуйн нэгжүүд хөл хорио, цар тахлыг эдийн засгийн хохирол багатай даван туулах том хөшүүрэг болсныг дурдах учиртай. Тийм ч учраас хасах руу орчихоод байсан эдийн засаг богино хугацаанд сэргэж, ноднин жилийн эцэс гэхэд 6.8 хувиар өсч, Дотоодын нийт бүтээгдэхүүн/ДНБ/ 36.7 их наядаас 63.3 их наяд хүртлээ нэмэгдэж, нэг хүнд ногдох ДНБ анх удаа 5220 ам.долларт хүрсэн үзүүлэлт гарсан юм.