Түгжрэл бууруулах төсвөөс Х.Нямбаатарын зөвлөх, Ж.Сүхбаатарын шавь Ч.Батзориг ингэж иджээ
Хотын дарга, нийслэлийн МАН-ын хорооны дарга Х.Нямбаатар өөрийн зөвлөх Ч.Батзоригийг НИТХ-ын сонгуульд Баянзүрх дүүргээс нэр дэвшүүлээд буй. Тэгвэл Ч.Батзориг нь түгжрэл бууруулах төсвөөс хувьдаа хумсалсан, хотын захиргаанд суух биш, хууль хяналтынханд шалгуулж суух ёстой нэгэн ажээ. Энэ удаад бид, Ч.Батзоригийн Хотын даргын зөвлөх, Түгжрэл бууруулах төслийн нэгжийн захирлын эрх мэдлээ ашиглан 8.3 тэрбум төгрөгийн тендерийг бэр дүүгийнхээ компаниар завшсан маш ноцтой баримтыг дэлгэж байна.
Эхэнд нь, Ч.Батзориг гэгч нь түгжрэлийн төсвөөс тонших эрх мэдэлд хэрхэн хүрснийг танилцуулъя. Одоогоос гурван жилийн өмнө буюу 2022 оны нэгдүгээр сарын 1-нд тухайн үеийн Хотын дарга Д.Сумъяабазар "Улаанбаатар хотын авто замын түгжрэлийг бууруулах нэгдсэн төсөл хэрэгжүүлэх нэгж”-ийг байгуулж, захирлаар нь Чимэддоржийн Батзориг гэх залууг томилсон. Ингээд зогсохгүй, Д.Сумъяабазар Ч.Батзоригийг Төсөл хөтөлбөр хариуцсан зөвлөхөөрөө томилж, давхар сэтэр зүүлгэсэн байдаг. Намтар нь нууцлаг, туршлага нь тодорхойгүй Ч.Батзориг гэгчийг Д.Сумъяабазар хэний татаасаар, хаанаас гаргаж ирж, түгжрэлийн асуудлыг хариуцуулж, өөртөө зөвлүүлж эхэлснийг нь тухайн үедээ хэн ч мэдээгүй.
Гэтэл үүнээс долоон сарын дараа буюу 2022 оны наймдугаар сард Түгжрэлийн сайдаар Ж.Сүхбаатар томилогдож, асуултын хариулт тодорхой болсон. Тодруулбал, Түгжрэл бууруулах төслийн нэгжийн захирал Ч.Батзориг гэгч нь Түгжрэлийн сайд Ж.Сүхбаатарыг "Улаанбаатар эрдэм" дээд сургуульд эрх зүйн багш байхад гарын шавь нь байсан нөхөр болж таарсан. Өөрөөр хэлбэл, Ж.Сүхбаатар өөрийгөө Түгжрэлийн сайд болно, төсөвт нь эзэн сууна гэдгээ эртнээс мэдэж байсан, тиймдээ ч шавийгаа өөрөөсөө түрүүлж Түгжрэл бууруулах төслийн нэгжийн захирал болгосон схем ойлгомжтой болсон гэсэн үг.
Ийнхүү нийслэлийн 1.5 сая иргэний толгойны өвчин болсон түгжрэлийг багш, шавь хоёр шийдэхээр болж, төсөв нь ч тэдний халаасанд шилжсэн. Улмаар Ж.Сүхбаатар, Ч.Батзориг хоёр гар, ганзага нийлэн, түгжрэлийн төсвөөр туйлж байсан нь "ногоон автобус”-ны хэргээр ил болж, Ж.Сүхбаатар АТГ-ын хаалга татсан. Харин Ч.Батзоригийг Х.Нямбаатар өөрийнхөө зөвлөх болгон аварч, бас авч үлдсэн. Одоо Х.Нямбаатар Ч.Батзоригийг НИТХ-ын төлөөлөгч болгохоор зүтгүүлж буй.
Х.НЯМБААТАРЫН ЗӨВЛӨХ Ч.БАТЗОРИГ ХОТЫН ТӨВД АВТОМАШИНЫ ДАВХАР ЗОГСООЛ БАРИХ 8.3 ТЭРБУМ ТӨГРӨГИЙН ТЕНДЕРИЙГ БЭР ДҮҮ Г.ЖАРГАЛЫНХАА КОМПАНИАР ЗАВШЖЭЭ
Хотын дарга Х.Нямбаатарын зөвлөх Ч.Батзориг айлын том, доороо дөрвөн дүүтэй. Төрсөн дүү Ч.Мөнхбат нь ЦЕГ-т ажилладаг. Харин Ч.Мөнхбатын эхнэр нь Гонжидийн Жаргал гэх эмэгтэй бий. Г.Жаргал нь "Эм Ти Юу” ХХК-ийг эзэмшдэг. Тэгвэл Х.Нямбаатарын зөвлөх Ч.Батзориг Түгжрэлийг бууруулах төслийн нэгжийн захирал байхдаа бэр дүү Г.Жаргалынхаа "Эм Ти Юу” ХХК-иар 8.3 тэрбум төгрөгийн тендер завшсан байгаа юм. Хамгийн ноцтой нь, Ч.Батзоригийн хувьдаа авсан уг тендер нь Улаанбаатар хотын түгжрэлийг бууруулах зорилгоор хотын төвд автомашины олон давхар зогсоол барих тендер байжээ.
.JPG)
Тодруулбал, Г.Батзориг 2022 оны есдүгээр сарын 8-нд "Их багтаамжийн зогсоол шинээр барих” нэртэй 8.3 тэрбум төгрөгийн төсөвтэй тендер зарлажээ. Гэтэл бэр дүү Г.Жаргалынх нь "Эм Ти Юу” ХХК нь хасагдсан байгаа юм. Тус тендерийг "амжилтгүй болсон” гэж цуцалсан. Улмаар Г.Батзориг хоёр сарын дараа буюу 2022 оны арваннэгдүгээр сарын 7-нд "Их багтаамжийн зогсоол шинээр барих” нэртэй 8.3 тэрбум төгрөгийн төсөвтэй тендерээ дахин зарласан. Бас л "Эм Ти Юу” ХХК нь хасагдсан. Тус тендерийг мөн л "амжилтгүй болсон” гэж бүртгэж цуцалсан. Гэтэл дахиад хоёр сарын дараа буюу 2023 оны гуравдугаар сард "Их багтаамжийн зогсоол шинээр барих” нэртэй өнөөх 8.3 тэрбум төгрөгийн тендерээ Нийслэлийн худалдан авах ажиллагааны газраар дамжуулан дахин зарласан. Харин тус тендерт нь "Эм Ти Юу” ХХК ганцаараа оролцож, ногоон гэрлээр шалгарчээ. Өөрөөр хэлбэл, Г.Батзориг дээрх 8.3 тэрбум төгрөгийг зөвхөн бэр дүүгийнхээ "Эм Ти Юу” ХХК-д өгөхийн тулд тус тендерийг нь гурван удаа зохион байгуулсан нь харагдаж байгаа юм.
.JPG)
.JPG)
Улаанбаатар хотын түгжрэлийг бууруулахын тулд зөвхөн 2022, 2023 онд л гэхэд 840 тэрбум гаруй төгрөг төсөвлөж, зарцуулсан. Гэхдээ энэ мөнгө хаашаа орсон нь тодорхойгүй, бид авто зам дээрээ тэг зогссоор буй нь бодит үнэн. Тэгвэл лавтай л дээрх мөнгөний 8.3 тэрбум нь Хотын дарга Х.Нямбаатарын зөвлөх Ч.Батзоригт очжээ гэсэн үг. Гэхдээ энэ бол түүний түгжрэлийн төсвөөс идсэн мөнгөний ердөө ганцхан жишээ нь. Бид дараагийн дугаартаа дэлгэрүүлэх болно.
Эцэст нь сонирхуулахад, Ч.Батзориг саяны сонгуулиар Хууль зүй, дотоод хэргийн сайд асан Б.Энхбаярын менежерээр ажиллаж, охин дүүгийнхээ компаниар сурталчилгааных нь санхүүжилтийг босгож өгчээ.
Сэтгэгдэл байхгүй байна.