ЭХНЭРИЙНХЭЭ ЖДҮ-ИЙН 200 САЯ, ХААДС-ИЙН 130 САЯ ТӨГРӨГИЙН ЗЭЭЛИЙГ ТӨЛӨӨГҮЙ БООМТЫН САЙД Б.ТУЛГА 1.5 ТЭРБУМААР СОНГУУЛЬДАХ НЬ ШУДАРГА УУ
Ерөнхийлөгч асан Н.Энхбаяр баруун, зүүн сугандаа хавчуулан бөөцийлж төдийгөөс өдий хүргэсэн, үхсэн ч өөрөөс нь урвахгүй үнэнч хоёр цэрэгтэй. Нэг нь Н.Энхбаярын төлөө шоронгийн камерт хоригдож явсан Б.Тулга. Нөгөө нь Н.Энхбаярын төлөө телевизийн камерт уйлж явсан Э.Эрдэнэжамъян.
Эхлээд Б.Тулга Н.Энхбаярын туслах, харин Э.Эрдэнэжамъян Н.Энхбаярын зөвлөх байлаа. Дараа нь, Б.Тулга МАХН-ын Ерөнхий нарийн бичгийн дарга, Э.Эрдэнэжамъян Нийслэлийн МАХН-ын дарга болж дэвшицгээж байв. Улмаар 2020 онд Н.Энхбаяр МАХН-аасаа Б.Тулгыг Сонгинохайрхан дүүрэгт, Э.Эрдэнэжамъяныг Налайх, Багануур, Багахангай дүүрэгт тус тус нэр дэвшүүлж байлаа. Хамгийн сүүлд, өнгөрөгч 2023 онд Н.Энхбаяр Боомтын сайдаар Б.Тулгыг, Боомтын сайдын зөвлөхөөр Э.Эрдэнэжамъяныг томилуулсан байдаг. Товчхондоо, Н.Энхбаярын тэрэг гэвэл хоёр дугуй нь Б.Тулга, Э.Эрдэнэжамъян хоёр байж ирсэн.
Тэгвэл Боомтын сайд Б.Тулга, түүний зөвлөх Э.Эрдэнэжамъян хоёр бизнесээ ч хамтран явуулдаг ажээ. Ноцтой нь, Б.Тулга, Э.Эрдэнэжамъян хоёрын компани нь төрөөс, татвар төлөгч та, бидний халааснаас 330 сая төгрөг авсан атлаа огт эргэн төлөөгүй өдий хүрч байгаа ажээ.
Б.ТУЛГЫН ЭХНЭР Ө.БУЯНДЭЛГЭР, Э.ЭРДЭНЭЖАМЪЯНЫ ААВ Н.ЭРДЭНЭБИЛЭГ ХОЁРЫН "МҮКҮ” ХХК НЬ ЖДҮХС-Д 202 САЯ ТӨГРӨГИЙН ӨРТЭЙ
Тодруулбал, Боомтын Б.Тулгын эхнэр Ө.Буяндэлгэр, түүний зөвлөх Э.Эрдэнэжамъяны аав Н.Эрдэнэбилэг хоёр "МҮКҮ” ХХК-ийг хамтран эзэмшдэг. "МҮКҮ” ХХК нь Булган аймгийн Дашинчилэн сумын I, II багийн нутагт 10 сая м2 буюу 1000 га тариалангийн газартай бөгөөд улаанбуудай, гурвалжин будаа тариалдаг ажээ.
Хамгийн ноцтой нь, Боомтын сайд Б.Тулгын эхнэр Ө.Буяндэлгэр, түүний зөвлөх Э.Эрдэнэжамъяны аав Н.Эрдэнэбилэг хоёрын "МҮКҮ” ХХК нь 2018 онд ЖДҮХС-гаас 200 сая төгрөгийн хөнгөлөлттэй зээл авсан. Гэвч зургаан жил өнгөрөхөд энэ зээлээ эргүүлэн төлөөгүй, хүү, алдингатайгаа 202 сая төгрөг болж, "Муу зээл”-ийн ангилалд орчихсон байна.
Б.ТУЛГЫН ЭХНЭР Ө.БУЯНДЭЛГЭР, Э.ЭРДЭНЭЖАМЪЯНЫ ААВ Н.ЭРДЭНЭБИЛЭГ ХОЁРЫН "МҮКҮ” ХХК НЬ ХААДС-Д 134 САЯ ТӨГРӨГИЙН ӨРТЭЙ
Цааш хөөвөл, Боомтын сайд Б.Тулгын эхнэр Ө.Буяндэлгэр, түүний зөвлөх Э.Эрдэнэжамъяны аав Н.Эрдэнэбилэг хоёрын "МҮКҮ” ХХК-ийн тоносон сан нь зөвхөн ЖДҮХС биш ажээ. Тодруулбал, "МҮКҮ” ХХК нь Хөдөө аж ахуйг дэмжих сангаас бордоо, техник, шатахуун, үрийн буудай авах төслүүдээр 157.1 сая төгрөг зээл авсан. Гэтэл "МҮКҮ” ХХК-ийн зээлийн эргэн төлөлтийн хугацаа нь 2022 онд дуусчихан, одоогоор 134.4 сая төгрөгийн зээлийн үлдэгдэлтэй байгаа ажээ.
Боомтын сайд Б.Тулга энэ сонгуульд Төв, Дархан, Сэлэнгэ аймгаас буюу Төвийн бүсийн V тойрогт нэр дэвшихээр МАН-даа хүсэлтээ өгчихсөн горилж яваа. Гэтэл Б.Тулга энэ сонгуульд V тойргийн сонгогчдод өөрийгөө сурталчлахын тулд халааснаасаа багадаа 1.5 тэрбум төгрөгийн зардал гаргах шаардлагатай. Эхнэр, зөвлөх хоёрынхоо ЖДҮХС-гийн 200 сая, ХААДС-гийн 134 сая буюу төрөөс, татвар төлөгч та бидний халааснаас авсан 334 сая төгрөгийн зээлийг нь эргүүлэн төлөөгүй атлаа УИХ-ын гишүүн болохын тулд 1.5 тэрбумаар сонгуульдах нь шударга уу. Цаашлаад, ЖДҮХС, ХААДС-ийн зээлээ эргэн төлөхгүй, газар тариалангийн салбарын олон арван аж ахуйн нэгжийн боломжийг хулгайлсан хүн газар тариалангийн өлгий нутаг буюу Дархан, Сэлэнгэ, Төв аймгийг төрд төлөөлөх нь шударга уу.
БООМТЫН САЙД Б.ТУЛГА, ТҮГЖРЭЛИЙН САЙД Б.ДЭЛГЭРСАЙХАН ХОЁР ХАЛААС НЭГТЭЙ ЮҮ
Бас нэг ноцтой баримт байна. Тодруулбал, Боомтын сайд Б.Тулгын эхнэр Ө.Буяндэлгэр нь "Дөрөвдүгээр фарм” ХХК-ийг "Дөрөвдүгээр эмнэлэг” ХХК-тай хамтран эзэмшдэг. Харин "Дөрөвдүгээр эмнэлэг” ХХК-ийг Банзрагчийн Золжаргал, түүний төрсөн дүү Банзрагчийн Баяржаргал хоёр хамтран эзэмшдэг. Банзрагчийн Золжаргал гэгч нь "Дөрөвдүгээр эмнэлэг” ХХК болон "Дөрөвдүгээр фарм” ХХК-ийн аль алиных нь гүйцэтгэх захирлаар ажилладаг ажээ. Хамаарлыг нь хөөвөл, Боомтын сайд Б.Тулга Монголын Уулчдын Үндэсний холбооны Ерөнхийлөгчөөр ажилладаг. Харин Монголын Уулчдын Үндэсний холбооны Дэд ерөнхийлөгчөөр нь Банзрагчийн Золжаргал гэх эмэгтэй ажилладаг ажээ. Өөрөөр хэлбэл, Хавдар судлалын үндэсний төвтэй хаяа залгаа нээгдсэн "Дөрөвдүгээр эмнэлэг"-ийн эзэн Б.Золжаргал нь Боомтын сайд Б.Тулгатай Уулчдын үндэсний холбоогоор, түүний эхнэр Ө.Буяндэлгэртэй "Дөрөвдүгээр фарм" ХХК-аар нэгдмэл ашиг сонирхолтой, хамаарал бүхий этгээд нь гэсэн үг. Тиймдээ ч "Дөрөвдүгээр эмнэлэг" ХХК болон "Дөрөвдүгээр фарм” ХХК-ууд нь өнгөрөгч дөрөвдүгээр сараас эхлэн зөвхөн Сэлэнгэ, Дархан-Уул, Төв аймгийн Нэгдсэн эмнэлгүүд болон тус аймгуудын хувийн эмнэлгүүдэд зүү, тариур үнэгүй хандивлаж, эмч, сувилагч нарыг нь сургалтад хамруулж байгаа ажээ. Өөрөөр бол, Боомтын сайд Б.Тулга сонгуулийн сурталчилгаа эхлэхээс өмнө өөрийн горилж буй Төв, Дархан, Сэлэнгэ аймгийн эмч, сувилагч нарыг "Дөрөвдүгээр эмнэлэг" ХХК болон "Дөрөвдүгээр фарм” ХХК-аар дамжуулан "найрч” байгаа дүр зураг харагдаж байгаа юм.
Тайлбар: "Дөрөвдүгээр эмнэлэг" ХХК-ийг эзэмшигч, гүйцэтгэх захирал Б.Золжаргал, Боомтын сайд Б.Тулга
Тэгвэл илүү ноцтой нэг баримт байна. Тодруулбал, "Дөрөвдүгээр эмнэлэг” ХХК-ийг Банзрагчийн Золжаргал, түүний төрсөн дүү Банзрагчийн Баяржаргал хоёр эзэмшдэг гэдгийг дээр дурдсан. Тэгвэл Б.Золжаргалын төрсөн дүү Б.Баяржаргал нь УИХ-ын гишүүн, Түгжрэлийн сайд Б.Дэлгэрсайханы хамаарал бүхий этгээд. Тодруулбал, Б.Баяржаргал нь 2010 оноос Б.Дэлгэрсайханы "Болдтөмөр ерөө гол” ХХК-ийн Тээврийн албаны даргаар ажилласан. Улмаар 2016 онд Б.Дэлгэрсайхан УИХ-ын гишүүн болмогцоо Б.Баяржаргалыг өөрийнхөө шадар туслах болгож 2021 он хүртэл таван жил цүнхээ бариулсан. Улмаар 2021 онд Б.Дэлгэрсайхан туслах Б.Баяржаргалыгаа өөрийн "Монголиан транс лайн” ХХК-ийнхаа хувьцаа эзэмшигч, гүйцэтгэх захирлаар томилсон. Ингээд 2021 онд Б.Дэлгэрсайхан туслах Б.Баяржаргалынхаа нэр дээр шилжүүлсэн "Монголиан транс лайн” ХХК-аараа дамжуулан Засгийн газартай концессын гэрээ байгуулж, Зүүнбаян-Ханги чиглэлийн төмөр замын ажлыг гүйцэтгэсэн. Тус төмөр замын нээлтийн үеэр Ерөнхий сайд Л.Оюун-Эрдэнийн хажууд Б.Дэлгэрсайхан, Б.Баяржаргал хоёр их л маадгар зогсож байлаа.
Тайлбар: "Дөрөвдүгээр эмнэлэг"-ийг эзэмшигч, ТУЗ-ийн дарга Б.Баяржаргал, Түгжрэлийн сайд Б.Дэлгэрсайхан
Өөрөөр хэлбэл, Боомтын сайд Б.Тулга Б.Золжаргалтай Уулчдын үндэсний холбоог хамтран эзэмшиж, удирддаг. Эхнэр Ө.Буяндэлгэр нь Б.Золжаргал, Б.Баяржаргал хоёртой "Дөрөвдүгээр фарм” ХХК-ийг хамтран эзэмшдэг. Харин Б.Баяржаргал нь Түгжрэлийн сайд Б.Дэлгэрсайханы туслах, "Монголиан транс лайн” ХХК-ийнх нь хувьцаа эзэмшигч, гүйцэтгэх захирал байсан. Ингэж харвал, Боомтын сайд Б.Тулга, Түгжрэлийн сайд Б.Дэлгэрсайхан хоёр цаагуураа халаас нэгтэй байж болзошгүй дүр зураг гарч ирж байгаа юм.
Сэтгэгдэл байхгүй байна.