Орон сууц нийтийн аж ахуйн удирдах газар, Хувийн орон сууц нийтийн аж ахуйн Хөгжлийн төв ТББ-тай хамтран ажиллах санамж бичгийг байгууллаа. Тус үйл ажиллагаанд "Орон сууц нийтийн аж ахуйн удирдах газар” ОНӨААТҮГ-ын даргын албан үүргийг түр орлон гүйцэтгэгч Д.Алтангэрэл, "Хувийн орон сууц нийтийн аж ахуйн хөгжлийн төв” ТББ-н гүйцэтгэх захирал П.Түвдэндорж, ОСНААУГ-ын Ерөнхий инженер Ж.Пүрэвжамц, Инженерийн бодлого, төлөвлөлтийн хэлтсийн дарга З.Дагдан, ХОСНААХТ-ийн Удирдах зөвлөлийн дарга "Ганбиж" ХХК-ний захирал С.Гантөмөр, "Хаусинг холд" ХХК-ний захирал Б.Туул болон бусад төлөөлөл оролцсон юм. Энэ үеэр "Орон сууц нийтийн аж ахуйн удирдах газар” ОНӨААТҮГ-ын даргын албан үүргийг түр орлон гүйцэтгэгч Д.Алтангэрэл хэлсэн үгэндээ: Манай байгууллага нь Улаанбаатар хотын төвлөрсөн дулаан хангамжаар хангагддаг орон сууцны байрны 49 хувь буюу 2200 орон сууцны байр 140,000 гаруй айл өрх, 11000 ААН, байгууллагыг хариуцан ус, дулаанаар 24 цаг хангаж ажилладаг. Үлдсэн өрх, ААН-үүдэд хувийн орон сууцны конторууд ус, дулаанаар хангах ажлыг хариуцан ажилладаг. Ижил үйл ажиллагаа явуулж байгаа хоёр байгууллага хамтран ажиллах санамж бичгийг өнөөдөр байгуулж байна. Санамж бичгийн хүрээнд хамтын ажиллагааг эхлүүлэх, шинэ техник технологи нэвтрүүлэх, харилцан туршлага солилцох, сургалт, семинар, уулзалт зохион байгуулах, урлаг, спортын гээд олон талт талуудын хамтын ажиллагааг өргөжүүлэх зорилготой гэж онцоллоо. ХОСНААХөгжлийн төв ТББ н удирдах зөвлөлийн дарга, Ганбиж ХХ-ний захирал С.Гантөмөр: Орон сууц нийтийн аж ахуйн салбарын норм, норматив шинэчлэхэд санал солилцох, Хөдөлмөрийн аюулгүй байдал, эрүүл ахуйн болон бусад чиглэлээр харилцан туслалцаа үзүүлэх, Мэдээлэл технологи, программ хангамж, инновацийн чиглэлээр харилцан туршлага солилцох, мэргэжилтэн нарын мэдлэг чадварыг дээшлүүлэхэд туслалцаа үзүүлэх, хууль, дүрэм, журмын өөрчлөлтөд харилцан санал солилцох, хамгийн гол нь ажилчдын нийгмийн асуудлыг шийдвэрлэх, цалин хөлсийг нэмэгдүүлэх тал дээр бид хамтарч ажиллах чиглэлээр санамж бичигт гарын үсэг зурж буйг хэллээ. Цаашид хоёр талаас ажлын хэсэг гарган төлөвлөгөө боловсруулан ажиллах юм байна.