Төр нэг гараараа цомхотгож, нөгөө гараараа томилно
Хамтарсан Засгийн газраас төрийн албанд 30 хувийн цомхотгол хийхээ мэдэгдсэн ч начир дээрээ улс төрийн томилгоогоо хийсээр байна. Сүүлд МАХН-ын ерөнхий нарийн бичгийн даргаар ажиллаж байсан Э.Эрдэнэжамъян, Гэр хорооллын хөгжлийн намын дарга Б.Батсүх, Тагнуулын ерөнхий газрын Сөрөх тагнуулын газрын дарга асан Д.Цогтбаатар нар Ерөнхий сайдын зөвлөх болсон. Мөн Засгийн газар хуралдаанаар УИХ-ын гишүүн асан Ж.Батзанданг Стратегийн ач холбогдолтой ордуудын төрийн эзэмшлийн хувь хэмжээг тогтоох хэлэлцээр хийх Засгийн газрын Бүрэн эрхт төлөөлөгчөөр томилсон юм.
Үүнээс гадна төрийн өмчит томоохон үйлдвэрийн газруудад менежер гэх албан тушаалд олон "тавиул"-аа шахсан нь иргэдийн шүүмжлэлд өртөж байна. Тэдний нэг нь УИХ-ын гишүүн асан М.Оюунчимэг. Түүнийг "Монголросцветмет” ТӨҮГ-ын бүтээмж хариуцсан менежерээр томилсон байдаг.
Төрийн томилгоо үүгээр тогтохгүй. Засгийн газраас "Багануур" ХК-ийн дэд дарга нарыг МАН, АН, ХҮН намаас шинэчлэн томилохоор болжээ. Тодруулбал, Ардчилсан намаас Улсын заан Д.Бумбаярын эхнэр Ц.Одонтунгалагийг, ХҮН намаас НИТХ-ын төлөөлөгч Д.Гантулга, МАН-аас Т.Отгонболд нарыг тус компанийн дэд даргаар томилох гэнэ. Салбарынхны зүгээс мэргэжлийн бус улс төрийн томилгоо хийх гэж байгаад шүүмжлэлтэй хандаж байгаа аж.
Ц.Одонтунгалагийн хувьд Ардчилсан намын Үндэсний бодлогын хорооны гишүүн. Түүнийг хүмүүс улсын заан Д.Бумбаярын эхнэр гэдгээр нь илүү таних биз. Тэрбээр 2012-2020 онд НИТХ-ын төлөөлөгчөөр ажиллахаас гадна "Автобус-1” НӨҮГ, "Зорчигч тээврийн нэгтгэл” ОНӨААТҮГ-ын захирлаар ажиллаж байсан нэгэн. Харин Т.Отгонболд нь Завхан аймгийн уугуул бөгөөд банкны эдийн засагч мэргэжилтэй. Түүний хувьд 2008 оноос Багануур дүүрэгт хэтсийн даргаар ажиллаж, 2013-2020 он Багануур дүүргийн Засаг даргын орлогч, Багануур дүүргийн ИТХ-ын дарга, 2024 оноос НИТХ-ын төлөөлөгчөөр ажилласан байна.
НИТХ-ын төлөөлөгч Д.Гантулга нь Боловсролын сайд П.Наранбаярын шавь аж. Тэрбээр нийслэлийн Багануур дүүрэгт ажиллаж, амьдардаг бөгөөд 2024 оны НИТХ-ын сонгуулийн 10-р тойрогт нэр дэвшсэн нэгэн. Түүний хувьд 2020 оноос ХҮН намд элсч, намын хорооныхоо даргаар ажилласан туршлагатай. Уул уурхайн мэргэжилтэй бөгөөд Төрийн захиргааны удирдлагын чиглэлээр Удирдлагын академид суралцаж, төгсчээ.
Сэтгэгдэл байхгүй байна.