Том хар машинтай, маяак дуугарган, хөгжим чангаар тавиад тамхи татан явдаг нэг залуугийн талаар жиргээч В.И.Саруул "Энэ машиныг нэг пацаан барьцан, тамхи татаал, чанга хөгжим, маякаараа охидыг эзэмдээл явдын. Хэний хүүхэд юм болоо” хэмээн твиттер хуудастаа жиргэсэнийг манай сайт "Олны үг ортой эсэхийг шалгалаа” булангаараа онцолсон билээ.

 

Тодруулбал 8050УНҮ улсын дугаартай хар өнгийн infiniti QX56 гэх 100-аад сая төгрөгийн үнэтэй уг машины эзэмшигч нь албан ёсоор Батчулууны Батчимэг гэх эмэгтэй байсан бол дээрх жиргээчийн бичсэнчлэн машиныг нь унаж явдаг залуу нь дуучин Ч.Цэлмүүний нөхөр Н.Алтанхайрхан байсан байна.

 

-АВТОМАШИНЫГ НЬ ЖУРАМЛАЖЭЭ-
Түүний инстаграм хуудаст ч уг машины эзэн гэдгийг нь нотлох зурагнууд олон байгаа юм. Тэр ч бүү хэл гар буу эзэмшдэг гэдгээ интаграм хуудастаа зарлан, зургийг нь дэлгэсэн байх юм билээ.

 

ЦЕГ-ын Лицензийн төвөөс ч уг машиныг маякын ямар ч зөвшөөрөлгүй гэдгийг хэлсэн. Тиймээс манай мэдээллийн мөрөөр Замын цагдаагийн газраас шалгалт явуулж, уг машины эзэмшигч Н.Алтанхайрханаас байцаалт авч, хэргийг бүртгэлжүүлж буй бол автомашиныг нь журмын хашаанд журамлаад байгаа талаар бидэнд албаны эх сурвалж мэдээллээ. Одоо ямар учраас хууль бусаар, зөвшөөрөлгүй маяк ашиглан замын хөдөлгөөнд оролцож байсныг нь шалгаж байгаа бөгөөд эх сурвалжийн хэлснээр түүний жолоо барих эрхийг нь хоёр жилээр хасах хүртэл арга хэмжээ авах байх гэсэн юм.