Хамгийн олон орны хэл мэддэг гэдгээрээ олонд танигдсан Б.Арго багш Сахарын диабит буюу чихрийн шижин өвчин хүндэрсний улмаас баруун хөлөө тайруулсан байна. Энэ талаар сүүлийн үед цахим ертөнцөөр их тархах болсон ба Б.Арго багшид туслах хандивын аян хүртэл өрнөөд байгаа юм. Тэрбээр эмнэлэгт чамгүй олон сар хэвтэн эмчлүүлсэн ба энэ хугацаандаа олон жил сэтгэлдээ бодож явсан итали, испани хэлний гэрийн багшийн хоёр номоо бичээд амжжээ.

Б.Арго энэ талаараа өөрийн цахим хуудаснаа "Хүн нэг л зүйлийн ту¬хай байнга бодож явах хэ¬рэгтэй байдаг юм байна. Бур¬¬хан багшийн сургаалд "Тө¬рөх, өвдөх, өтлөх, үхэх дө-рөв хорвоогийн дөрвөн үнэн” гэж сургасан байдаг. Сахарын диабит буюу чихрийн шижин өвчин хүндэрсний улмаас баруун хөлөө тайруулсан. Энэ аюулт өвчнөөс миний амь насыг аварсан Нэгдсэн гуравдугаар эмнэлгийн Зүрх, судасны мэс заслын хамт олон болон Эрдэнэсүрэн эмчдээ баярласан талархсанаа илэрхийлье. Намайг дэмжиж, үр хүүхдүүддээ надаар хичээл заалгаж байсан Монголынхоо гэгээн сэтгэлт ард түмэнд энэ дашрамд маш их баярласнаа илэрхийлье. Хөлөө тайруулж долоо найман сар хэвтэрт байхад их л олон зүйл бодогддог юм байна. Энэ хугацаанд олон нийтийн мэдээллийн хэрэгсэлд мэдэгдэхийг хүсээгүй. Ажилдаа хэт улайрч, эрүүл мэнддээ анхаараагүй маань хувийн хариуцлагагүй алдаа байж. Тэнгэр бурхан, сайн хань, сайн багшийн буянаар ямар ч байсан ус уух хувьтай л хүн байж, би. Хөлтэй эрүүл саруул явах үедээ хүн юу ч боддоггүй юм байна. Яг ингээд хөл мөчгүй болоод ирэхээр орж буй байгууллага маань хэдэн шаттай билээ, хэдэн давхарт билээ гээд янз бүрийн зүйл их боддог юм байна. Долоо найман сар хэвтэрт байсан ч намайг номын цагаан буян л босголоо. Эмнэлэгт өвчнөө яаж давж туулах вэ гэж бодож олон жил сэтгэлдээ бодож явсан итали, испани хэлний гэрийн багшийн хоёр номоо суугаагаараа бичлээ" хэмээн ярьжээ.

Л.Баяр