Жолооны хүрдний ард суусан хүн согтуу байгаа тохиолдолд машин асахгүй байх технологийг нэвтрүүлэхээр ажиллаж байгаа нэг компани бий. Харин АНУ-ын засгийн газар үүнийг санхүүжүүлэхээр төлөвлөж байна.

Учир нь ихэнх жолооч согтуу үедээ жолооны хүрдний ард суухдаа "За юу л болов” гэж боддогтой холбоотой

Нью Йоркын сенатор Чак Шюмер "Жолоочийн аюулгүй байдлын тулд согтуу эсэхийг таних систем”-ийг санхүүжүүлэхээр болсон тухай мэдэгджээ. Энэхүү технологи нь жолоочийг согтуу байгаа эсэхийг ямар нэг үлээлгэх төхөөрөмжгүйгээр тодорхойлох чадвартай.

Тиймээс энэ төсөлд зориулан 48 сая ам. доллар хөрөнгө оруулалт хийж, зургаан жилийн хугацаа олгох аж. Анх энэ төслийг өнгөрсөн зургадугаар сарын 25-нд Нью Мехикогийн сенатор Том Удалл танилцуулж байжээ.

Согтуурлын хэмжээг тодорхойлох технологи нь амьсгалын болон мэдрэгчид суурилсан байх юм. Ингээд жолоочийн цусан дахь алкохолийн хэмжээ хуулийн дагуу зөвшөөрөгдсөн хэмжээ болох 0,08-аас их байвал авто машин ажиллахгүй. 

Төслийг санаачлагчид энэ технологийг бүх төрлийн машинд стандарт болгон хэвшүүлэхийг хүсэж байгаа аж. Судалгааны ажил бүрэн дууссаны дараа авто машин үйлдвэрлэгчид өөрсдөө шинэ машиндаа энэ технологийг суурилуулах эсэхээ шийдэх эрхтэй болох бол энгийн худалдан авагчид ч гэсэн сонголт хийх эрхтэй болно. 

2014 оны гуравдугаар сарын судалгаагаар согтуугаар тээврийн хэрэгсэл жолоодож яваад саатуулагдсан хүмүүсийн 25 хувь нь давтан хэрэг үйлдсэн байжээ. Үүний учир нь ихэнх жолооч согтуу үедээ жолооны хүрдний ард суухдаа "За юу л болов” гэж боддогтой холбоотой.

Тиймээс дээрх технологийг нэвтрүүлсэн тохиолдолд согтуу хүн машин жолоодох аргагүй болж согтуугаар замын хөдөлгөөнд оролцож яваад өөрийн болон бусдын амь насыг хохироох явдал тэгтэй тэнцэж ч болох юм.