УИХ-ын гишүүн Ц.Оюунгэрэл хорих ангид өлсгөлөн зарлаад улмаар бие нь муудаад буй Г.Дэнзэнг эргэжээ. Энэ талаараа тэрбээр өөрийн твиттер хуудсаар жиргэжээ. Ц.Оюунгэрэл "Дэнзэн ийм байдалдтай байна лээ. Бүх бие дотор болон толгой нь их өвдөж буй гэсэн. Өрөөндөө ганцаараа, цоожтой байна лээ” хэмээн зургийг нь жиргэсэн байна. ЗГХЭГ-ын дэд дарга асан, "Эрдэнэставантолгой” ХХК-ийн ТУЗ-ийн даргаар ажиллаж байсан Г.Дэнзэн нь өнгөрсөн тавдугаар сарын 21-ний өдрөөс хойш ШШГЕГ-ын харьяа цагдан хорих 461 дүгээр ангид хоригдож байгаа. Тэрбээр өөрийгөө хэлмэгдсэн хэмээн үзэж, өлсгөлөн зарлаад 13 хонож байна. Улмаар бие нь илт муудаж, "шок”-ийн байдалтай хорих ангид байгаа юм. Өмгөөлөгч болон ар гэрийнхнийнх нь зүгээс батлан даалтад гаргах хүсэлтийг удаа дараа хүргүүлсэн ч мөрдөн байцаалтын явцад саад учруулж болзошгүй гэх үндэслэлээр хүсэлтийг хүлээн авахгүй байгаа аж.