Харин Израиль хүчтэй багийн талбайд тэнцсэнээр нэг оноо авч, 13 оноотой боллоо. Тэд үлдсэн хоёр тойрогт хожиж чадвал хэсгээс гарах боломж байна. 

Харин хүснэгтийн хоёрдугаар байрт бичигдэж байсан Бельгийн шигшээ энэ тойрогт Киприйн талбайд зочилж, 0:1-ээр буулгаж авснаар 17 оноотой болж, Уэльсийн шилэн дээр дарж ирлээ.  Ингэснээр хэсгээс гарах боломжоо өндөрсгөж байгаа юм. Үлдсэн хоёр тойргоос нэг хожил авахад л Францийг зорих эрхтэй болох учиртай. Энэ удаагийн тоглолтын хувь заяаг шийдсэн цорын ганц гоолыг 86 дахь минутад Эдин Азар оруулж, багтаа ялалт авчирсан. Харин Киприйн шигшээ 9 оноотой үлдэж, плей-офф мөрөөдөхөөс өөр авралгүй үлдлээ.

Энэ хэсгийн гурав дахь тоглолт Босни Герцеговин болон Андоррын шигшээ багийн хооронд болж, талбайн эзэд 3:0-ээр өрсөлдөгчөө буулгаж авлаа. Ингэснээр Босни 11 оноотой болж ирж байгаа. Үлдсэн хоёр тоглолтдоо сайн үзвэл тэдэнд хэсгээс гарах онолын боломж байна. Мөн гуравдугаар байраар гарч, плей-оффын тоглолт хийх ч боломжтой юм. Тоглолтын 14 дэх минутад Бичакчич гоолдож, тооны харьцааг нээсэн. Улмаар 30 дахь минутад Жеко урьдчилсан шатны 7 дахь гоолоо оруулсан бол 45 дахь минутад Лулич гүйцээжээ. 

Н.Болд