"Ирвэс хамгаалах сан” ТББ-ын ирвэс судлаач, биологич Т.Лхагвасүмбэрэл гэмт халдлагад гурван удаа өртсөн, амь насаа алдсан эрүүгийн хэргийг нэгтгэн Мөрдөн байцаах газрын дэд даргаар ахлуулсан ажлын хэсэг байгуулагдан мөрдөн байцаалтын ажиллагаа үргэлжилж байна.

"Ирвэс хамгаалах сан” ТББ-ын ирвэс судлаач, биологич Т.Лхагвасүмбэрэл амь насаа алдсан хэрэг гарсан даруйдаа олны анхааралд өртөж, олон нийт энэхүү хэргийн үнэн мөнийг олж тогтоох ёстойг хууль хяналтынхан болон төрөөс шаардсан.

Хэргийн мөрдөлт эхэлсний дараа цагдаагийн байгууллагаас хэвлэлд мэдээлэл хийж, талийгаачид хийсэн задлан шинжилгээний урьдчилсан дүн болон хэргийн мөрдөн байцаалтын явцад илэрсэн зарим баримтыг танилцуулсан. Задлан шинжилгээгээр талийгаач живэлт буюу амьсгалын замд шингэн зүйл орж нас барсан, хөнгөн зэргийн согтолттой байсан гэдэг урьдчилсан дүгнэлт гарсан. Хэргийн газрын үзлэг хийсэн Хөвсгөл аймгийн Цагдаагийн газрын  мөрдөн байцаагчийн тэмдэглэлд талийгаачийн автомашинаас  хоёр ширхэг гар утас олдсон. Нэг гар утас дээр бичлэг хураагдсан байсан. Утасны цэнэг дуусах гээд байсан учир бичлэгийг компьютерт хуулж аваад, гар утсыг хохирогчийн ар гэрт хүлээлгэж өгсөн гэж тэмдэглэгдсэн зэргийг мэдээлж байсан юм.

Б.Хүлэг