Монголын нийгэм өрөндөө баригдаж дуусах нь. Эх орон хэдэн саяын өртэй байхад би ч аргагүй гэх иргэдийн хэнэггүй байдал газар авсаар. "Залуу хүний чимэг өр шир” гэдэг. Тиймээс "өргүй хүн тэнэг” гэгдэх яриа гарч байсаар байна.

Тэрний хүүхэд нь  сайн яваа байр савтай болсон гэхчлэн яриа газар авсаар. Үнэндээ бол 15-20 жилийн өрөнд орон "өвдөх, үхэх” эрхгүйгээр ажлын "мал” болон зүтгэж байгаа хөөрхийс. Яг үнэндээ бэлэн мөнгөөр орон сууц худалдан авч байгаа иргэн  5-7 хувьд хүрэх үү үгүйтэй л байдаг байна.

Арилжааны банкууд зээлийн эргэн төлөлтөнд сэтгэл ханамжгүй байгаа бол иргэд шавхаад, шавхаад  банкныхаа өрийг дарж чадахгүйд хүртлээ эдийн засаг доройтоод байна. Эдийн засаг сонгуулийн дараа ч сэхэл авахгүй хэмээн таамаглаж байгаа бол иргэд банкны өрийг эдийн засаг сэргэтэл түр хойшлуулж өгөөч хэмээн дуу хоолойгоо нийлүүлж байгаа юм.

Ийнхүү хаа хаанаа санхүүгийн бэрхшээлтэй байгаа нийслэлийн иргэдийн гурван  хүн тутмын нэг нь зээлийн эргэн төлөлтийн дарамтанд орсон байгаа хэрэг.

Сайн яваа хүний хэмжүүр банкны шаардлагыг "давж” өрөн орсон хүнийг хэлдэг гэхэд нэг их зөрөхгүй нь бололтой. "Ажил хийж байгаа тулдаа мөнгөгүй байна ажилгүй бол өртэй байхгүй юу” гэсэн шог яриа олон нийтийн цахим хуудсаар тарсаар. Иргэдийн энэ их өрийг зөвхөн хүүгээ төлөөд эдийн засаг сэргэтэл түр аргацаах арга зам байна уу эрхэм түшээдээ. Одоо сонгуулийн сурталчилгаа хийхэд тань "өрнөөс салгаж өгөөч” гэсэн гуйлтууд "хөврөх” байх шүү. Сонгуульдаа бэлтгэхдээ иргэдэд юу хэрэгтэй байгааг танд ойртуулан мэдээлэе эрхэм түшээдээ.

Б.Саран