Риогийн татамид жүдо бөхийн эрэгтэйчүүдийн 90 кг-ын жинд өрсөлдсөн Лхагвасүрэнгийн Отгонбаатар хүрэл медалийн үзүүрээс атгаад алдлаа. Тэрээр медалийн төлөөх барилдаанд Хятадын жүдоч Чэнь Шунжаотой учраа таарч, юүко үнэлгээ алдснаар ялагдал хүлээлээ.

Л.Отгонбаатар эхний тойрогт Нидерландын бөхийг, удаах тойрогт Кубын бөх дэлхийн аварга Э.Гонзалесийг ялсан юм. Гэвч дараагийн тойрогт Гүржийн бөхөд торгуулийн хуудасны илүүгээр ялагдал хүлээн дагах барилдаан хийсэн. Дагах барилдаандаа Азербайжаны бөхийг ялан хүрэл медалийн төлөө хүч үзсэн юм.

Энэ жингийн Алтан медалийг Японы Машу Бакер хүртэж, мөнгөн медаль Гүржийн Варлам Липартиани зүүлээ. Хүрэл медалийг БНСУ, БНХАУ-ын бөхчүүд хүртжээ.

Ч.Амар