Дилма Руссефийг огцорсны дараах дэлхий нийтийн хандлага
-Эквадор, Болив, Венесуэль улс элчингүүдээ татахаар болсноо зарлалаа-
Эквадор. Эквадорын Ерөнхийлөгч Рафаэль Корреа Бразилаас эрх бүхий төлөөлөгчөө татахаа мэдэгджээ. Тэрбээр "Дилмаг авч хаялаа. Эрх мэдлээ хэтрүүлэн ашигласан, урвасан үйлдлийг магтъя. Бид ЭСЯ-ны итгэмжит хүмүүсээ татах болно. Бид энэ үйлдлийг хэзээ ч хүлээн зөвшөөрөхгүй. Энэ бол манай Америк тивийн хамгийн хар бараан мөчийг санагдуулж байна. Бидний эв санаа нөхөр Дилма, Лула да Силва ба Бразилийн бүх ард түмэнтэй хамт” хэмээн "Твиттер” хуудсандаа бичжээ. Эквадор улс өнгөрсөн тавдугаар сард Руссефийн эсрэг үйл ажиллагаа явагдаж эхлэх үед л элчингээ татсан билээ.
Болив. Тус улсын Ерөнхийлөгч Эво Моралес ч элчингээ татсанаа зарлалаа.
"Яг одоо шаардлагатай арга хэмжээг авахын тулд бид ч бас өдгөө Бразилаас элчингээ татаж байна. Бид Дилма, Лула, танай ард түмэнтэй энэ хүнд цаг үед хамт байх болно” хэмээн "Твиттер” хуудсаараа дамжуулан мэдээлжээ.
Венесуэль. Венесуэль улсын засаг захиргаа хөрш оронтойгоо харилцаагаа зогсоох шийдвэр гаргажээ. "Венесуэлийн Засгийн газар Бразилаас элчингээ эцэслэн татаж, парламентын эргэлт хийхэд оролцсон Засгийн газартай улс төрийн болон дипломат харилцаагаа зогсоох шийдвэр гаргалаа” гэж мэдэгдсэн байна. Гадаад харилцааны яамных нь тэмдэглэснээр "ах дүү улс нь 54 сая бразилийн эрх чөлөөнд хууль бусаар халдаж, Үндсэн хуулиа зөрчсөн” гэнэ.
Түүнчлэн "Бүгд найрамдах Боливарын Венесуэль улс Бразилд Ерөнхийлөгч Дилма Руссефийн эсрэг явуулсан парламентын төрийн эргэлтийг эрс шүүмжилж байна” гэж баримтад бичжээ.
Куба. Кубад ч мөн Руссефийг огцорсон асуудлыг шүүмжлэн хэлэлцэж байна. "Кубын хувьсгалт Засгийн газар Ерөнхийлөгч Дилма Руссефийг түлхэн унагасан парламент, хууль зүйн эргэлтийг шийдэмгий хэлэлцэж байна” гэж Кубын Засгийн газрын мэдэгдэлд дурджээ. Кубын засаг захиргааныхны сануулснаар Руссефийг шүүмжилж буй олон хүн өөрсдөө авлигын хэрэгт холбогдож байсан гэнэ.
"Ерөнхийлөгчөө төрийн эрхээс зайлуулсан, түүнтэй хамт Хөдөлмөрчдийн нам болон улс төрийн зүүн хүчний холбоотнуудыг авлига, гэмт хэргийн ямар нэгэн баримтгүйгээр түлхэн унагасан нь ард түмнийхээ итгэл үнэмшлээр сонгосон сонголтыг үл хүндэтгэж байгааг гэрчилж буй юм” гэжээ.
АНУ. АНУ Бразилтай өмнөх түвшний харилцаагаа хадгалж үлдэнэ гэж Төрийн департаментын хэвлэлийн албаны дарга Жон Кирби үзэж байна. Тэрбээр "Сенатаас Үндсэн хуульдаа нийцүүлэн Ерөнхийлөгч Руссефээ огцруулах санал хураасан тухай мэдээлэл авлаа. Бразил манай улс хоорондын хоёр талт бат бэх харилцаа урьдын адил үргэлжилнэ гэдэгт бид итгэлтэй байна” гэж мэдэгджээ.
Түүний тэмдэглэснээр Руссефийг огцруулсан нь "Бразил улсын дотоод асуудал” гэнэ. "Энэ бол Бразилийн ард түмний шийдвэр. Бид түүнийг нь хүндэтгэн үзнэ” гэж Кирби нэмж хэлсэн байна.
НҮБ. НҮБ-ын Ерөнхий нарийн бичгийн дарга Бан Ги Мүн Бразилийн шинэ Ерөнхийлөгч Мишель Темерт хамгийн сайн сайхныг хүсчээ.
"Ерөнхийлөгч Темер албан тушаалаа хашиж эхэлж буй энэ үед Ерөнхий нарийн бичгийн даргын зүгээс түүнд хамгийн сайн сайхан бүхнийг хүсэн ерөөж байна. Тэр Темерийг төрийн тэргүүн байх хугацаанд Бразил, НҮБ уламжлалт дотно түншлэлээ үргэлжлүүлнэ гэдэгт итгэж байгаа” хэмээн хэлснийг "РИА Новости” агентлагт бичжээ.
Бразилийн ГХЯ-ны эх сурвалжуудын мэдээлж байгаагаар тус улс Дилма Руссефийг огцруулсан асуудалд шүүмжлэлтэй хандсан Венесуэль, Эквадор, Болив зэрэг улсаас ч элчингүүдээ татахаар болжээ.
Эх сурвалж:
Сэтгэгдэл байхгүй байна.