АН-ын даргыг сунгаагаар тодруулах асуудал яригдаад цөөнгүй өдөр өнгөрөв. Энэ хугацаанд намын даргад өрсөлдөх дөрвөн хүний нэр тодорхой болсон бөгөөд эднээс хамгийн түрүүнд УИХ-ын гишүүн Ж.Батзандан намын даргад өрсөлдөнө хэмээн нэрээ өгсөн юм.

Тэгвэл өчигдөр Ж.Батзандан гишүүн Төрийн ордонд гэнэтхэн хэвлэлийн бага хурал зарласанаар сурталчилгаа гэх үү, шоу гэх үү зүйлээ хэдийн хийгээд эхэлжээ. 

Учир юу вэ гэхээр, АН-ын дотоод сонгуулийн хороог ахалж буй Ж.Оюунбаатарын хэлж буйгаар дэнчингийн тухай ярилцаж байгаа ч эцсийн шийдвэр гараагүй аж. Өөрөөр хэлбэл 250 сая төгрөгийн сураг төдий мэдээллээр Ж.Батзандан гишүүн шоудсан болж таарч байгаа юм.

Намын даргын сонгуулийг улс орон даяар өргөн хүрээнд явуулах учраас багагүй хэмжээний зардал гарах нь тодорхой. Тиймээс дэр дэвшигчид дэнчингийн мөнгөө хувиасаа гаргах нь ч ойлгомжтой юм. Тэр тусмаа Ардчилсан нам шиг том намын даргыг сонгох сонгууль анх удаа ийнхүү бүх гишүүдийн дунд өргөн хүрээнд явагдаж байгаа нь гарах зардлаасаа илүү чухал үр дүн дагуулна гэдэг нь ойлгомжтой. 

Тун удахгүй АН-ын дотоод сонгуулийн хороо шийдвэрээ гаргаж нэр дэвшигчийн дэнчингийн мөнгөн дүнг тодорхой болгоно. Тэр болтол харин Ж.Батзандан гишүүн дахин ямар шоу хийхийг хэлж мэдэх хүн АН-д одоохондоо алга бололтой. 

time.mn