Доналд Трамп “Toyota Motor” компанийг сүрдүүлжээ
АНУ-ын ерөнхийлөгчөөр сонгогдсон Дональд Трамп АНУ-ын зах зээлд нийлүүлэх автомашины үйлдвэрийг Мексикт барьсан тохиолдолд их хэмжээний татварын дарамттай учрах болно гэж "Toyota Motor” компанийг сүрдүүлжээ. Тэрбээр АНУ-ын зах зээлд борлуулалт сайтай байдаг "Corolla” маркийн автомашины үйлдвэрийг АНУ-д бус, Мексикт барьсан тохиолдолд их хэмжээний гаалийн татвар төлөх ёстой гэж үзэж буй юм байна. Трамп твиттер хуудастаа "Toyota Motor АНУ-ын зах зээлд нийлүүлэх "Corolla”-г Мексикт үйлдвэрлэсээр байхад шинэ үйлдвэр барина гэж байна. Тийм юм байхгүй! Нэг бол АНУ-д үйлдвэр барь, үгүй бол гаалийн өндөр татвар төл” хэмээн жиргэжээ.
"Toyota Motor” компанийн ерөнхийлөгч Акио Тоёода түүний энэхүү мэдэгдлийн дараа "Мексик дэх авто үйлдвэрлэлээ хязгаарлах бодол ойрын төлөвлөгөөнд байхгүй” хэмээн мэдэгдсэн байна. Улмаар тус компанийн АНУ дахь салбарын удирдлага энэ асуудлаар гаргасан мэдэгдэлдээ Мексикт шинэ үйлдвэр ажиллаж эхэлсэн ч АНУ дахь үйлдвэрлэл, ажлын байр буурахгүй гэдгийг онцолжээ. Тус компани АНУ-ын нутаг дэвсгэрт 10 салбар үйлдвэртэй юм байна. Трампын энэ мэдэгдлийн дараа "Toyota” компанийн хувьцааны ханш Токиогийн хөрөнгийн биржид гурав орчим хувиар буурчээ.
Сэтгэгдэл байхгүй байна.