Түвдийн гэвш лам Денгэлаа Дорноговь аймгийн Хөвсгөл сум "Говийн догшин ноён хутагт Данзанравжаа”-н нутагт нутгийн иргэн Э.Отгон-Эрдэнийн урилгаар морилон саатаж ахмад настан болон сүсэгтэн олонд номын авшиг хүртээж хийморийн сан тавьж даллага аван сүсэгтэн олон шавь нарынхаа сэтгэлийн өглөгийг түгээж хуран цугласан олонд насны үрэл рашаан утлага тарааж буяныг чууллаа. Буяны үйлийг даган баяссан нутгийн олон гэвш ламтан Денгэлаа-д баярласан сэтгэлээ илэрхийлж дахин саатахыг хүсэн мордууллаа.

Монголчуудад элэгтэй гэвш ламтан Денгэлаа буян номын ариун үйлд энэ л биеэ зориулан номын их Багшийн маань хорвоод мэндэлсэн өдөр арваннэгдүгээр сарын 1-нд Батсүмбэр дахь улсын асрамжийн газрыг зорин ахмадуудад нас буян арвижихын тухайтад насны ном айлдаж ерөөл хуран хийморийн сан тавьж сүсэгтэн олон шавь нарынхаа сэтгэлийн өглөгийг түгээн нэгэн өдрийг өнгөрүүсэн юм. Ахмад настангууд маань энэ л өдрийг сэтгэл догдлон хүлээгээд нулимс дуслуулан хүүрнэж сүүн цацлаа өргөн биднийг үдлээ. Мөн өөрийх нь төрсөн нутаг Балба улсад хүчтэй газар хөдлөлтийн улмаас олон мянган иргэд амь насаа алдаж, сүм хийд түүхэн дурсгалт газар олноор сүйдэж, гэр оронгүй иргэд, эцэг эхгүй өнчирч хоцорсон хүүхэд багачуудад зориулж ерөөл хурж, Бурхад сахиусанд Цогчид өргөж сүсэгтэн олон шавь нартайгаа сэтгэлийн зул өргөж буяныг хураалаа. Мөн буян номын их үйлийг хуран цугласан сүсэгтэн олон шавь нар нь даган баясахын чацуу хорвоод мэндэлсэн өдрийг нь хүндэтгэн Багшаа урт наслуулахын тухайтад Мандал өргөн, Морин хуур эгшиглүүлэн М.У.Г дуучин Н.Чулуунхүү Буян номын Багшдаа зориулсан "Сэтгэлийн дуудлага” хэмээн дуу дуулж хүндэтгэл үзүүллээ.

Мөн намрын адаг сарын шинийн 22-нд Бурхан багш тэнгэрийн орноос газарт буун эхийнхээ ачийг хариулсан өдөр энэ сарын 3-ны өдөр тохиож Балбын гэвш ламтан Дэнгела өөрийн номын өргөөнд цугласан олонд Бурхан багшийн тарнийн лүн айлдаж Бурхан багшийн сургаал номлолыг тайлбарлаж тарнийн лүн хүртээж Хүмүүний энэ л заяандаа нүглийг тэвчиж өчүүхэн төдий буяныг үйлдэж тус болж чадахгүй аваас хор бүү хүргээрэй хэмээн сүсэгтэн олондоо сургаал айлдан сэтгэлээ ариун тунгалаг, санаа бодлоо зөв байлгаж буяны зам мөрөө ариун байлгахыг хичээгээрэй хэмээн цугласан олондоо айлдав.