Талибан 230 гаруй барьцааны хүнийг суллалаа
Лалын босогчдын "Талибан” бүлэглэл Афганистаны хойд нутгийн нэгэн тосгоны оршин суугчдыг хайр найргүйгээр хөнөөснөөсөө хэд хоногийн дараа 200 гаруй барьцааны хүнийг суллалаа.
Тус бүлэглэлийнхэн өнгөрсөн долоо хоногийн ням гарагт Сар-и Пул мужийн Мирзаваланг тосгоны энгийн номхон 50 иргэн, тэдний дотор хүүхэд эмэгтэйчүүдийг хөнөөж, олон зуун хүнийг барьцаалсан юм. Тус бүлэглэлийнхэн өчигдөр буюу мягмар гарагт барьцааны 235 хүнийг сулласан байна.
Гэхдээ мужийн захиргааны хэвлэлийн төлөөлөгчийн мэдэгдсэнээр, дахиад ч хэдэн зуун хүн барьцаанд байгаа бололтой.
Сүүлийн саруудад Афганистаны байдал улам тогтворгүй болсоор байна. НҮБ-ын мэдэгдсэнээр, энэ оны эхний хагаст Афганистанд 1662 энгийн номхон иргэн амь үрэгджээ.
Афганистаны армийнхан болон цагдаа нарт тусалж буй армийн алба хаагчдынхаа тоог нэмэгдүүлэх эсэхийг АНУ-ын Ерөнхийлөгч Дональд Трампын засаг захиргаа авч хэлэлцэж байгаа аж.
Сэтгэгдэл байхгүй байна.