БНХАУ-ын 300 тэрбум ам.долларын бараа бүтээгдэхүүнд нэмэлт татвар ногдуулах тухай АНУ-ын Ерөнхийлөгч Дональд Трампын засаг захиргаа даваа гарагт мэдэгдэнэ.

 

АНУ-ын Худалдааны төлөөлөгчийн газар Худалдааны актын 301-р зүйлийн дагуу оюуны өмчийн дүрэм журмыг зөрчсөн БНХАУ-ын бараа бүтээгдэхүүнд нэмэлт татвар ногдуулахаар бэлтгэж байгаа ажээ. 

АНУ-ын шаардлагыг хүлээн зөвшөөрөхөд шахалт үзүүлэхийн тулд Д.Трампын засаг захиргаа нэмэлт татварыг ашиглахаар төлөвлөж байна.

Өнгөрсөн долоо хоногийн баасан гарагт Вашингтон БНХАУ-ын 200 тэрбум ам.долларын бараа бүтээгдэхүүнд ногдуулсан нэмэлт татварыг 10 хувиас 25 хувьд хүргэж нэмэгдүүлсэн билээ. Үүнтэй холбогдуулан хариу арга хэмжээ авахад бэлэн байгаагаа Бээжингийн засаг захиргаа мэдэгдсэн юм. Хоёр талын төлөөлөгчдийн худалдааны хэлэлцээний сүүлийн үе шат хэлэлцээргүй өндөрлөсөн байна.

АНУ-ын Ерөнхийлөгчийн зөвлөхийн мэдээлснээр, ирэх сард Японд болох "Их 20”-ийн дээд хэмжээний уулзалтын үеэр Д.Трамп, БНХАУ-ын дарга Си Жиньпин нар уулзах төлөвтэй байгаа ажээ.

"АНУ-БНХАУ-ын төлөөлөгчид худалдааны хэлэлцээгээ үргэлжлүүлнэ” гэж Цагаан ордны эдийн засгийн зөвлөх Ларри Кудлов ням гарагт "Fox News” сувагт өгсөн ярилцлагадаа тэмдэглэсэн байна.