Элчин сайдын яамд, Иракийн төрийн байгууллагууд оршдог Багдад хотын "ногоон бүс”-д лхагва гарагийн орой хэд хэдэн пуужин унажээ.

 

"Sky News Arabia” телевизээр мэдээлснээр хотын төвд түгшүүрийн дохио ажилласан бол нүдээр үзсэн хүмүүсийн мэдээлснээр, дэлбэрэлт болсон байна.

Генерал Касем Сулейманиг хороосны хариуд Иран лхагва гарагт шилжих шөнө АНУ-ын цэргүүдийн байрлаж буй Иракийн хоёр баазад пуужингийн цохилт өгсөн юм.

"Al-Baghdadia” телевизээр мэдээлснээр, Багдадын "ногоон бүс” рүү хоёр пуужин харважээ. Пуужингуудын нэг нь АНУ-ын Элчин сайдын яам оршдог гудамжнаас холгүй, харин хоёр дахь нь Засгийн газрын цогцолборын баригдаж буй барилга дээр тусжээ.

Энэ удаад пуужин харвасны улмаас хүний амь нас хохироогүй харин эд материалын хохирол учирсан байна. Одоо халдлагад өртсөн бүсүүдэд АНУ-ын нисдэг тэргүүд эргүүл хийж байгаа аж.