Өчигдөр буюу тавдугаар сарын 03-нд "Мэдээллийн урсгал" хөтөлбөрт Сангийн сайд Б.Жавхлан оролцох үеэр Зариг.мн сайтын сэтгүүлч Н.Өнөрцэцэг нь УИХ-ын гишүүн асан Ц.Гарамжавын хувь эзэмшдэг компани 33 тэрбум төлөх гурван шатны шүүхийн шийдвэр, төлөгдөх явцын талаар тодруулсан. Гэвч Сангийн сайд Б.Жавхлан тухайн үед мэдээлэлгүй гэх шалтгаанаар энэ асуудлаар мэдээлэл өгөөгүй юм. Тэгвэл Сангийн сайд Б.Жавхлан нь өнөөдөр /2021.05.04/ "Мэдээллийн урсгал" хөтөлбөрт энэ асуудалтай холбоотой тодорхой мэдээллийг өгчээ. 

Мөн Гаалийн ерөнхий газраас энэхүү асуудалтай холбоотой тодруулжээ.

ГЕГ-ын Хуулийн хэлтсийн ахлах байцаагч Ч.Тамираа: "Монцемент билдинг" компани нь МУ-ын гаалийн хилээр 2014 оны 12 сараас 2018 он хүртэл импортийн тоног төхөөрөмж оруулж ирээд үүндээ гаалийн албан татвар 7,3 тэрбум төгрөг, НӨАТ 15,5 тэрбум төгрөг, нийлээд 22,9 тэрбум төгрөгийн татварын өглөг үүсгэчихээд байгаа.Гаалийн албан татвар 7,3 тэрбум төгрөгөө "Монцемент билдинг" компани нь төлөхгүй гэж шүүхдэлцсэн байдаг. Харин Шүүхээс тухайн компанийн гаргасан нэхэмжлэлийг хүчингүй болгож, өрөө төлөх ёстой юм байна гэдэг шийдвэр гаргасан. Нийт 22,9 тэрбум төгрөг дээрээ бодитой төлөгдөх өрийн асуудал, дээр нь нэмээд гаалийн тухай хуулийн 294 дүгээр зүйлд заагдсан татварыг хугацаандаа төлөөгүй бол өдөр тутамд хүү, алданги тооцдог. Хүү, алдангийн дүн 11 орчим тэрбум төгрөг. Ингээд нийт 33 орчим тэрбум төгрөгийн татварын өглөг, өр, авлага, алданги, хүү нийлсэн өглөгтэй байгаа.