УИХ-ын гишүүн Ц.Анандбазарыг УИХ-ын дарга болон "МИАТ” ТӨХК-ийн Гүйцэтгэх захиралд Бага тэнгэрийн аманд хаус бэлэглэсэн гэх баримтууд хэвлэлд дэлгэгдэж байсан. Газрын төлбөрөө төлөөч ээ” гэдэг асуудлыг тавьснаас хойш өнөөдрийг хүртэл "авлигын хадаг” болсон "Бага тэнгэр сити”-ийн газрын төлбөрийн хэмжээ 2.3 тэрбум төгрөгт хүрээд байна. Энэ талаар эргэн сануулъя.

    УИХ-ын гишүүн Ц.Анандбазарын эзэмшлийн "Нью тур” ХХК нь Баянзүрх дүүргийн 11 дүгээр хорооны нутаг дэвсгэр, Бага тэнгэрийн амны тусгай хамгаалалттай газарт 62 га газрыг "аялал, жуулчлалын бааз байгуулах чиглэлээр ашиглахаар БОАЖЯ-тай 2006 оны нэгдүгээр сарын 2-нд гэрээ байгуулсан байдаг. Энэ гэрээний хүчинтэй хугацаа 2020 оны 12 дугаар сарын 31-нд дуусгавар болсныг цахим мэдээллийн сангаас харж болно. Гэхдээ энэ нь үүнээс ч өмнө авсан байж болзошгүй бөгөөд гэрээний сунгагдсан үеэс эхэлсэн бүртгэл байж болох юм. Өөрөөр хэлбэл "Нью тур” ХХК-ийн эзэмшлийн энэхүү газрын суурь үнэ нэгж га нь 960 сая төгрөг, дуудлага худалдааны анхны үнийн итгэлцүүр 0.75, дуудлага худалдааны анхны үнэ 43 тэрбум 374 сая 600 мянган төгрөгөөр үнэлэгдсэн бөгөөд аялал жуулчлалын бааз байгуулах нэрийдлээр авсан. Өнөөдрийн байдлаар нэр бүхий хүмүүст хаус бэлэглэсэн хэмээн зарлагдаад, цахим хуудсуудаар амины орон сууц барих зар тавьчихаад анх газар авсан аялал жуулчлалын зориулалттай газартаа амины орон сууц барьж зараад байгаа нь хууль бус үйлдэл бөгөөд Засгийн газрыг залилан мэхэлж ашиг олж байгаа явдал юм.

     Гэтэл тус компанийг анх авснаасаа өөр зориулалтаар ашиг олохын тулд үе үеийн Засгийн газрын хууран мэхэлж гэрээгээ сунган 43 тэрбумын үнэ бүхий газрыг гоё сайхан зориулалтаар авчихаад хэмжээг нь 10 гаруй га-гаар хэтрүүлэн хаус барьж байхад тэдгээрийг бариулах зөвшөөрөл болон Нийслэлийн хот байгуулалт хөгжлийн газраас зураг төсөл, архитектурын төлөвлөлтийн даалгавар өгсөн албан тушаалтнууд юу хийж байв? Тэдгээр хаус барилгуудыг хүлээж авсан Улсын комисс нь хүртэл хамт гэмт хэрэг үйлдсэн хэрэг биш гэж үү. Бүр үе үеийн Засгийн газар, Байгаль орчны сайд нар, Дархан цаазат газрын хамгаалалтын захиргааны дарга нар Монгол Улсын хууль тогтоомжуудыг ноцтойгоор зөрчиж байсныг чимээгүйхэн хүлээн зөвшөөрөөд байдаг нь харамсалтай.

    Энэ талаар АТГ Богдхан уулын дархан цаазат газарт газар авсан өгсөн бүгдийг нь шалгаж эхлээд байгаа нь сайн хэрэг. Олон жил дураараа дургисан энэ нөхцөл байдалтай тэмцэнэ гэдгээ зарласан Нийслэлийн шинэ удирдлагууд, Нийслэлийн газрын албанд олон нийт итгэсээр удлаа. Цаашид итгэсээр л байх уу.

     УИХ-ын гишүүн Ц.Анандбазарын эзэмшлийн "Нью тур” компанийн тухайд л гэхэд зөвхөн 2020 онд газар ашигласны төлбөр 867 сая 492 мянган төгрөгийн татварыг Нийслэлийн газрын албанд төлөх өртэй байсан бол одоо энэ өр 2.3 тэрбум төгрөгт хүрлээ. Түүнээс өмнөх жилүүдэд Засгийн газраас ямар үнээр тогтоосон хэдэн төгрөгийн өртэй байсныг олж тогтоож ёстой. Учир нь Засгийн газраас тогтоодог суурь үнэ өөрчлөгдсөн нь үүнд нөлөөлдөг. Тэгэхээр зөвхөн сүүлийн жилүүдийн гэрээний төлбөрийн зөрүүний хэмжээ одоо хэдэн тэрбумд хүрсэн болоод шүүхдээд байгаа хэрэг вэ? Дашрамд хэлэхэд, шүүх прокурорын байгууллага дахь Ц.Анандбазарын нөлөө бүхий хамаарлыг сэтгүүлч, хэвлэн нийтлэгчид байтугай Монголын төр дийлэхээ больлоо. Хөгжлийн банкнаас зээл авчихаад зориулалтын бусаар ашиглачихаад бүгдийг нь гэнэт огцом төлөөд дуусгачихад ч дуугүй л алгаа хавсраад харж байдаг. Газрын төлбөрөө төлөхгүйгээр өөр зориулалтаар газар эзэмшиж хөлжсөн ч татвараа авч чадахгүйгээр таг чиг болдог. Яагаад олон жил төрийг авлигадаж бизнесээ хөгжүүлсэн улстөрчтэйгээ төр нь  хариуцлага тооцож чадахаа болив гэдгийн цаад шалтгаан нь авлигаас өөр юу ч биш. Одоо Богд уулынхаа газрыг хурааж авъя, авлигаар авсан эсэхийг шалгая гэхчлэн зарлаж байсан эрх баригчдаас зөвхөн амлалтынх нь биелэлтийг нэхье. Амлалтаа биелүүлж иргэдтэй ижил эрх, үүрэгтэй байлгаж чадахгүй бол авлига авсанд тооцож хардах болно.

https://asu.mn/content/18004