УИХ-ын гишүүн Н.Алтанхуягийн Эрүүгийн байцаан шийтгэх хуульд нэмэлт өөрчлөлт оруулах тухай, Прокурорын байгууллагын тухай хуульд нэмэлт өөрчлөлт оруулах хуулийн төсөл, Эрүүгийн байцаан шийтгэх хуульд нэмэлт оруулах тухай хуулийн төслийг УИХ-д өргөн барьсан нь нэлээн асуудал дагуулж байна. Энэхүү хуулийн төслийг өргөн барьснаар АТГ, Н.Алтанхуяг нарын хооронд багагүй асуудал үүсээд байгаа юм. Мөн Н.Алтанхуягийг саатуулсан гэх мэдээлэл зарим нэг сайтаар мэдээлэгдсэн. Энэ талаар АТГ-аас тодруулахад "Зориудаар ийм мэдээлэл түгээж байна. Н.Алтанхуягийг огт саатуулаагүй” гэх мэдээллийг өглөө.

Түүнчлэн өнгөрсөн баасан гарит АТГ-ын албан ёсны твиттер хаягийг дуурайлгаж хуурамч аккаунт нээж, зөвхөн Алтанхуягийн эсрэг дараалан жиргэсэн байна. АТГ-ын албан ёсны твиттер хаяг нь @NOcorruptionMGL юм, гэтэл @NOcorruptionMNG гэсэн хаяг хуурамчаар нээгээд Н.Алтанхуягийн эсрэг жиргэжээ. Энэ тухай АТГ-аас мэдэгдэл хийсний дараа устгасан байна.

Түүнчлэн өнөөдөр нийтлэлч Бааварын хаягийг дуурайж, хуурамч аккаунт нээж Н.Алтанхуягийн эсрэг жиргэсэн байжээ.