МАХН-ын ерөнхий нарийн бичгийн дарга Ц.Шаравдорж өчигдөр "Монгол” телевизэд ярилцлага өгөхдөө сайд Г.Шийлэгдамбыг АТГ-аас баривчилсан асуудлыг хөндөв. Ингэхдээ тэрбээр хэвлэлд огт гараагүй нэгэн баримтыг дурьдсан бөгөөд "Г.Шийлэгдамба ах дүү нартайгаа мөнгө төгрөгийн асуудалтай байсан байж магадгүй” гэжээ. 500 сая төгрөгийн авлига авч байгаад баригдсан хэмээн хэвлэлээр яригдаж буй мэдээллийн тухайд тэрбээр "Нэгжлэг хийсний дүнд тодорхой хэмжээний мөнгө гарсныг үгүйсгэхгүй” гэж хэлсэн байна. Мөн сонирхолтой нь Ц.Шаравдорж Засгийн газрын гишүүнийг саатуулан баривчлахтай холбоотой хууль эрхзүйн асуудлыг хөндсөн бөгөөд ингэхдээ "Сайдын албан тушаалтай хүнийг баривчлахдаа Засгийн газрын тухай хуулийн 25 дугаарт заасны дагуу ерөнхий сайдаас зөвшөөрөл авах ёстой. Гэтэл аваагүй. Нөхөж авдаг, тийм юм болсон юм шиг байгаа юм” гэжээ.