Ийм байтал ганцхан хүн амын тоо баримтад тулгуурлаж орон нутгийн тойргийг багасгаж нийслэл хотын тойргийг нэмнэ гэдэг нь учир дутагдалтай. Хэрэв ийм шийдвэр гаргавал Үндэсний аюулгүй байдал,  тусгаар тогнолд сөргөөр ч нөлөөлж болзошгүй. Нэгдүгээрт, хөдөө орон нутаг эзгүйрч, улсын тусгаар тогтнол, бүрэн эрхт байдал, үндэсний аюулгүй байдалд сөргөөр нөлөөлнө. Хоёрдугаарт, Улаанбаатар хотын асуудал хүндэрнэ. Нөгөө л хот руу чиглэсэн бодлого хэрэгжиж орон нутгийн оршин суугчид олноороо хотыг бараадах болно. Ингэснээр хязгаар нутаг эзгүйрэх аюул тулгарна. Тиймээс хүн амын тоо чухал ч газар нутгийн талаар заавал бодож үзэх ёстой. Шинэ батлагдсан Сонгуулийн тухай хуулийн "22.4.Улсын Их Хурлын сонгуулийн тойргийг энэ хуульд заасан сонгуулийн тогтолцоо, аймаг, нийслэл, сум, дүүргийн хүн амын тоо, засаг захиргаа нутаг дэвсгэрийн нэгжийн хуваарийг харгалзан санал авах өдрөөс 150-иас доошгүй хоногийн өмнө Улсын Их Хурал байгуулж, тойргийн нутаг дэвсгэр, дугаар, төв, мандатын тоог тогтооно" хэмээн заасан байгаа юм. Зах хязгаар нутаг руу төрийн бодлого хүрч чаддаггүй. Хууль сурталчилах нь байтугай гишүүд нь сонгосон иргэдтэйгээ уулзаж чаддаггүй. Орон нутагт 500 хүн цуглуулж уулзалт хийх гэхэд л асуудалтай байдаг. Сумын төвөөсөө зайдуу оршин суудаг малчид төдийлөн иймэрхүү төрлийн уулзалтад ирж оролцоод байж чаддаггүй. Хөдөө болон хотын харьцаа харьцангуй ялгаатай энэ цаг үед Үндсэн хууль зөрчсөн өөрчлөлт хийх хүсэлт гаргаж, түүнийг нь хэлэлцэж байгаа нь олон нийтийн зүгээс ихээхэн шүүмжлэл дагуулж байна. Үүнийхээ оронд харин ч бүр зах хязгаар нутаг руу мандатын тоог нэмж, түлхүү анхаарч ажиллах ёстой.