Энэ оны эхний хоёр сарын эцсийн байдлаар Монгол Улсын ажилгүйдлийн түвшин 8.3 хувьтай байна. Энэ нь өмнөх оны мөн үеэс 1.8 нэгжээр нэмэгдсэн үзүүлэлт болжээ. Улирлын чанартай буюу бүтээн байгуулалт зогсдог үед буюу нэг, хоёрдугаар сард хөдөлмөрийн зах зээл уналттай харагддаг олон жилийн дундаж байдаг гэдгийг Хөдөлмөр эрхлэлтийн үндэсний төвөөс мэдээлсэн.

Хөдөлмөрийн байгууллагад бүртгэлтэй, ажил хайгч иргэдийн тоо 48 мянга байгаа аж. Түүнчлэн зах зээлд бүртгэлтэй, нээлттэй ажлын байрны тоо 7000-д хүрчээ. Хоёрдугаар сарын байдлаар эдгээр ажлын байранд 4000 хүн зуучлагдан орж, ажилтай болсон аж. Эдийн засгийн салбараар авч үзвэл үйлдвэрлэл, үйлчилгээний салбар хамгийн эрэлттэй байгаа бөгөөд улирлын шинж чанартайгаар барилгын салбар дахь ажиллах хүчний эрэлт багасчээ.

Харин уул уурхайн салбарт хамгийн их ажлын байр бий болгож, үзүүлэлт нь жил бүр өсөлттэй байсан бол 2015 оноос жилийн дүнгээр буурчээ. Одоогоор уул уурхайн салбараас ажилгүй болсон иргэдийн тоо 9.3 мянга болсон аж.

Т.Гэрэл