Д.Ганцэцэг: А.Ганчимэг залуу уран бүтээлчдийнхээ дунд шилдэг нь байж үнэхээр чадсан
Монголын кино урлагийн шилдгийн шилдгийг шалгаруулдаг "Академи Авардс-2016” наадам өнгөрсөн бямба гарагт "Их тэнгэр цогцолборт”-т болсон билээ. Зургаа дахь удаагийн тус наадамд шилдэг 24 бүтээл, 17 номинацийн төлөө өрсөлдсөн. Тус наадмын шилдгийн шилдэг уран бүтээлээр Содура кино шалгарсанд нэлээдгүй уран бүтээлчдийн бухимдаж, өөрийн цахим хуудастаа тус наадмын шударга бус шүүлтийн талаар бичсэн. Тэгвэл "Хувьсал" продакшны жүжигчин, СТА Ганцэцэг өөрийн фэйсбүүк хаягаараа дамжуулан, мөн л тус наадмын шүүлт, зохион байгуулалтад сэтгэл дундуур байгаа илэрхийлжээ.
Тодруулбал, өөрийн фэйсбүүк хуудсандаа "Академи Авардс. Сүржин нэртэй, даржин наадам. Булхай ихтэй нөхдийн тоглоом. Энэ жилийн авардст манай продакшн "Атганд үлдсэн эрдэнэ " бүтээлээ сойсон билээ. Кино урлагийн төлөө зүтгэж, хүч хөлсөө урсган, оюун тархиа шавхан ажилладаг уран бүтээлчдийн амнаас энэ наадмын эргэн тойрон дахь хов жив , холион бантанг бишгүй л сонсож байсан. Мянга сонсохоор нэг үз гэдэг дээ. Өчигдрийн үйл ажиллагаа нь энэ наадам нь үнэхээр явуургүй булхай байдаг гэдэг нь илт боллоо.
Манай бүтээлийн хувьд үнэхээр будлиан орсон ч хийснээрээ бут цохиод гарч ирж чадна хэмээн зургийн найруулагч Д.Ангараг, эмэгтэй гол дүрийн жүжигчин А.Ганчимэг, ерөнхий зураач Khurlee Tsogt нартаа маш их итгэж байлаа. Шилдэг эмэгтэй гол дүр. Бид ч гэлтгүй үзэгчид уран бүтээлчид бүгд А.Ганчимэгийг авна гэж хүлээж итгэж байсан. Энэ нь ч олон зүйл дээр харагдсан. Ёслолын ажиллагаа өндөрлөнгүүт хамгийн түрүүнд сэтгүүлч Золоо ах минь Ганухыг авсангүй хэмээн итгэж ядсан харцаар гүйн ирж " Зүгээрээ, миний дүү бол жинхэнэ дүр бүтээсэн" хэмээн үнэн сэтгэлээсээ халаглан харамсан хэлсэн юм.
Ингээд л зөвхөн ГАНУХ руу ирж баяр хүргэсэн уран бүтээлчдийн цуваа хөвөрсөн дөө.С.Болд - Эрдэнэ, Цэрэнболд, П.Цэрэндагва ах гэх мэтчилэн цааш хөвөрсөн. Ганух Тайвангийн дүрийн төлөө шаналж, өвдөж, тарчилж байсан. Эрэгтэй дүрд тоглох учраас ээж байхаа ч умартан ажилласан. Нөр их хугацаанд тун их хөлс хүч, сэтгэл зүрхээ зарцуулан ажилласан. Ганцхан жишээ нь морь унаж сурахад л амьдралынхаа 2 сарын хугацааг зарцуулсан. Тайвангийн дүрийг Ганух жинхэнэ амилуулсан. Ийм ур чадвар шаардсан дүрийг, ингэж өндөр хэмжээнд гаргах жүжигчин ойрын хэдэн жилдээ гарахгүй байхаа хэмээн АЖ Н.Мягмарнаран ах минь нээлтэн дээр сэтгэл догдлон өгүүлж байсансан. А.Ганчимэг залуу уран бүтээлчдийнхээ дунд шилдэг нь байж үнэхээр чадсан” хэмээн бичжээ.