Манай улсад амжилттай зохион байгуулагдсан АСЕМ-ын дээд хэмжээний уулзалтад оролцогсдод зориулан барьсан "АСЕМ виллаж” хотхоны орон сууцнуудыг худалдаж эхэлсэн байна. 360-500 ам метр талбай бүхий дээд зэрэглэлийн 53 хаус болон үйлчилгээний цогцолборыг Хүрхрээгийн аманд байгуулсан билээ. Эргэн төлөгдөх нөхцөлтэйгөөр Хөгжлийн банкны санхүүжилтээр барьсан уг хотхоны захиалагч нь MCS групп байсан. Үүнд нийт 60 тэрбум төгрөгийг зарцуулжээ. АСЕМ-ын дээд хэмжээний уулзалт болохоос өмнө авч эхэлсэн захиалгын дагуу хотхоны орон сууцны 70 хувийг борлуулаад байгаа ч үнэ өртгийг нэлээд нууцалж, зөвхөн худалдан авагчтай харилцан тохиролцож байгаа аж. Тус хотхоныг барьж босгоход MSC групп 70 сая гаруй ам.долларын хөрөнгө оруулалт хийсэн бөгөөд "Скай ресорт” цанын бааз, гольфын талбай зэргийг байгуулснаас гадна уулын явган болон дугуйн аяллын зам нээхэд тохиромжтой гэж үзэж байна.

Д.Мөнх